UYAMATI yini lona lomsikati lomuhle lotako kutewuhlangana naDavide? Ligama lakhe ngu-Abigayili. Abelungile, futsi wavimba Davide kutsi angenti intfo lembi. Ngembi kwekuba sifundze ngaloku, ase sibone kutsi yini lebeyenteka kuDavide.

Ngemuva kwekutsi Davide sekabalekele Sawula, wabhaca emhumeni. Bomnakabo kanye nemndeni wakubo wonkhe beta kutewubhaca naye. Kwakungemadvodza langu-400 leta kuye, futsi yena waba ngumholi wawo. Davide wabese uyahamba uya enkhosini yakaMowabi watsi: ‘Ngicela kutsi bobabe namake bahlale lapho kakho, ngize ngibone kutsi kutakwentekani kimi.’ Ngekuhamba kwesikhatsi Davide kanye nemadvodza labekanye naye bacala bayobhaca etintsabeni.

Kwakungemuva kwaloku lapho Davide ahlangana na-Abigayili. Indvodza ya-Abigayili Nabali beyicebile futsi inendzawo yayo. Beyinetimvu letingu-3 000, kanye netimbuti letingu-1 000. Abeyindvodza lenemona, kodvwa umkakhe Abigayili abemuhle, futsi abekwati kwenta tintfo letinhle. Ngalelinye lilanga wasindzisa umndeni wakhe. Ase sibone kutsi wakwenta njani loko.

Davide nalamadvodza labenawo bambonisa umusa Nabali. Bamsita bamgadzela timvu takhe. Ngako ngalelinye lilanga Davide watfuma labanye kulamadvodza kutsi baye kuNabali bayewucela kudla. Lamadvodza efika akhandza Nabali netisebenti takhe bahhula boya betimvu. Kwakulilanga lelidzili, futsi Nabali abenetintfo letinyenti letidliwako. Ngako naku lokwashiwo ngulamadvodza: ‘Sibenemusa kuwe, ngoba asizange sebe timvu takho, kodvwa siye sakugadzela tona. Sicela usiphe kudla.’

Nabali wawaphendvula watsi: ‘Angeke ngiphe emadvodza lengingawati nekutsi aphumaphi kudla kwami.’ Wakhuluma kabi, futsi washo netintfo letimbi ngaDavide. Ngalesikhatsi lamadvodza abuyela emuva, afike atjela Davide ngako konkhe loku. Davide watfukutsela kakhulu nakeva loko, watsi kulamadvodza: “Hlomani tikhali tenu!” Lamadvodza ahloma, atsatsa luhambo lekuyobulala Nabali netisebenti takhe.

Lomunye wetisebenti taNabali weva ngalesikhatsi asho lamavi lamabi, watjela Abigayili ngaloko lokwentekile. Ngaso leso sikhatsi Abigayili watsatsa kudla, wakwetfwalisa timbongolo takhe wacala luhambo lwakhe. Watsi nakabona Davide, washeshe wehla embongolweni yakhe, wakhotsama embikwakhe watsi: ‘Ngiyacela, nkhosi yami, ungayinaki indvodza yami Nabali ngoba isilima futsi yenta tintfo letibulima. Nasi sipho. Ngicela usitsatse, futsi ngicela usitsetselele ngaloko lokwentekile.’

Davide wamphendvula watsi: ‘Ungumfati lohlakaniphile, ngobe ungivimbile kutsi ngingambulali Nabali nekutsi ngingamphindziseli lokubi lakwentile. Hamba ubuyele ekhaya ngekuthula.’ Ngekuhamba kwesikhatsi Nabali asafile, Abigayili waba ngulomunye webafati baDavide.