HATENE sé mak feto bonita neʼebé mai hasoru David? Nia naran Abigail. Nia matenek, no nia hapara David husi hahalok aat ida. Maibé, antes ita aprende kona-ba ida-neʼe, mai ita haree saida mak akontese ba David.

Depois David halai husi Saul, nia subar iha fatuk-kuak ida. Ninia maun sira no família hotu hamutuk ho nia. Maizumenus mane naʼin-400 mós hamutuk ho nia, no David mak sai sira-nia ulun-naʼin. Tuirmai, David bá hasoru Moab nia liurai no hatete: ‘Favór ida, husik haʼu-nia aman no inan hela hamutuk ho Ita-Boot toʼo haʼu haree saida mak mosu mai haʼu.’ Tuirmai, David no ninia ema subar iha foho sira.

Depois neʼe, David hasoru Abigail. Abigail nia laʼen Nabal toʼos-naʼin ida neʼebé riku. Nia iha bibi-malae 3.000 no bibi-timur 1.000. Nabal mak ema ida neʼebé laran-aat. Maibé, ninia feen Abigail bonita tebes. No mós, Abigail hatene oinsá atu halo buat neʼebé loos. Loron ida, nia mós salva ninia família. Mai ita haree oinsá.

David no ninia ema hatudu laran-diʼak ba Nabal. Sira ajuda hodi proteje Nabal nia bibi. Tan neʼe, David haruka ninia ema balu atu husu favór ida husi Nabal. David nia ema hasoru Nabal ho ninia ema kuandu sira tesi hela bibi sira-nia fulun. Loron neʼe loron-boot, no Nabal iha hahán diʼak barak. Nuneʼe, ida-neʼe mak David nia ema dehan: ‘Ami hatudu tiha laran-diʼak ba Señór. Ami la naʼok Señór nia bibi, maibé ami ajuda tau matan ba bibi sira-neʼe. Agora, favór ida, fó hahán balu mai ami.’

Nabal hatete: ‘Haʼu sei la fó hahán ba ema hanesan imi.’ Nia koʼalia ho laran-hirus, no hatete aat David. Kuandu David nia ema bá fali no fó-hatene David buat neʼebé akontese, David hirus tebes. Nia hatete ba ninia ema: ‘Foti imi-nia surik!’ Sira bá atu oho Nabal ho ninia ema sira.

Nabal nia ema ida, neʼebé rona Nabal koʼalia ladiʼak, fó-hatene Abigail buat neʼebé akontese. Iha tempu neʼebá kedas Abigail prepara ai-han. Nia tula ai-han neʼe ba kuda-burru balu no bá atu hasoru David. Kuandu nia hasoru David, nia tun husi kuda-burru, hakruʼuk ba David no hatete: ‘Naʼi, favór ida, labele hola ba lia. Haʼu-nia laʼen Nabal beik-teen, no nia halo buat neʼebé beik. Ida-neʼe mak prezente ida. Favór ida simu prezente neʼe, no fó perdua ami.’

David hatán: ‘Ita feto matenek. Ita hapara haʼu atu oho Nabal neʼebé laran-aat. Fila ba uma ho dame.’ Lakleur, kuandu Nabal mate, Abigail sai David nia feen ida.