60-нҗы хекая

Абигаил ве Давут

ДАВУДЫҢ янына гелйән овадан аялың кимдигини билйәңми? Онуң ады Абигаил. Ол өрән пайхаслы аял. Ол Давуды эрбет иш этмекден саклаяр. Йөне онуң билен танышмаздан өң, гел, Давуда нәме боланыны билели.

Давут Саулдан гачып говакда гизленйәр. Онуң янына доганлары ве гарындашлары гелйәр. Җеми онуң янына 400–е голай адам гелйәр. Давут оларың баштутаны боляр. Соңра Давут Моаб патышасының янына барып: «Хайыш эдйәрин, нәме болҗагыны билйәнчәм, какама ве эҗеме сениң юрдуңда галмага ругсат бер» диййәр. Шондан соң Давут адамлары билен дагда гизленйәр.

Ынха, Давут Абигаиле душяр. Онуң адамсы Набал байды. Шейле-де онуң 3 000 гойны билен 1 000 гечиси барды. Набал эрбет адам. Онуң аялы Абигаил болса өрән оваданды, эдйән ишлери-де пайхаслыды. Бир сапар ол машгаласыны-да халас этди. Гел, муны нәдип эдендигини билели.

Давут ве онуң адамлары Набала ягшылык этдилер. Олар онуң малларыны горамага көмек эдйәрди. Бир гезек Давут адамларыны Набалың янына хайыш билен иберйәр. Давудың адамлары Набалың янына баранда, ол көмекчилери билен гоюнларыны гыркярды. Бу гүн байрамчылык гүнүди, Набалың иере тагамлы зады кәнди. Шонуң үчин Давудың адамлары: «Биз саңа ягшылык этдик, гоюнларың бирини-де алмадык. Гайтам, олара гөзегчилик этмәге көмек этдик. Шонуң үчин бизе иймәге зат бер» дийип хайыш этдилер.

Набал: «Мен сиз ялы адамлара иймәге зат бермен» дийип, гахарлы җогап берйәр. Соңра Давут барада эрбет затлар айдяр. Олар гелип Давуда бар зады гүррүң беренде, ол гаты гахарланяр. Ол адамларына: «Элиңизе гылыч алың!» диййәр. Шейдип, Набалы ве онуң адамларыны өлдүрмәге гидйәр.

Набалың адамларының бири онуң Давут барада айдан эрбет сөзлерини эшидип, Абигаиле гүррүң берйәр. Абигаил дессине иере зат йыгнап, оны эшеклере йүклейәр-де, ёла дүшйәр. Давуды гөрен бадына, эшекден дүшйәр-де баш эгип: «Агам, адамым Набала гахарың гелмесин. Ол акмак ве акмак ишлер эдйәр. Ине, бу саңа бизден совгат. Хайыш эдйәрин, муны ал-да, гүнәмизи геч» диййәр.

Давут оңа: «Сен пайхаслы аял. Набал маңа эрбетлик эдендиги себәпли оны өлдүрмекчидим. Сен мени Набалы өлдүрмекден сакладың. Саг-аман өйүңе долан» диййәр. Соңра Набал өленден соң, Абигаил Давудың аялларының бири боляр.

1 Патышалар 22:1—4; 25:1—43.