KUMBI wamuziŵa munthukazi wakutowa yo watuza kuzikumana ndi Davidi? Zina laki ndi Abigaili. Iyu ngwazeru ndipu wangukaniza Davidi kuchita chinthu chiheni. Kweni techendasambiri ivi, tiyi tiwoni vo vingumuchitikiya Davidi.

Davidi wati wathaŵa Sauli, wanguchibisama ku mphanji. Aku ŵaki ndi abali ŵaki wosi angumulondo. Anthurumi wosi pafupifupi 400 anguza kwaku Davidi ndipu iyu wanguja mulongozgi wawu. Pavuli paki, Davidi wanguluta kuchikambiya fumu ya ku Moabu kuti: ‘Chondi azomerezgeni ada ndi ama kuti aje ndi imwi kuti ndiwoni dankha vo vindichitikiyengi.’ Pavuli paki, Davidi ndi ŵanthu ŵaki anguchibisama kumapiri.

Vati vachitika ivi, Davidi wangukumana ndi Abigaili. Nabala murumu waku Abigaili, wenga munthu wakukhupuka kweniso wenga ndi charu chikulu. Iyu wenga ndi mbereri 3,000 ndipuso mbuzi 1,000. Nabala wenga munthu wankhaza. Muwoli waki Abigaili wenga wakutowa ukongwa ndipu wachitanga vinthu vamampha. Nyengu yinyaki iyu wangupozomoska banja laki. Tiyi tiwoni mo wanguchitiya.

Davidi ndi ankhondu ŵaki angumuchitiya lisungu Nabala. Yiwu angumuwovya kuvikiliya mbereri zaki. Zuŵa linyaki, Davidi wangutumiza ankhondu ŵaki anyaki kuchipempha Nabala kuti waŵawovyi. Ankhondu ŵaku Davidi ŵati afika, angumusaniya Nabala ndi ŵanthu wo amuwovyanga kusenga mbereri. Ili lenga zuŵa la phwandu ndipu Nabala wenga ndi vakurya vinandi. Sonu ankhondu ŵaku Davidi angukambiya Nabala kuti: ‘Tingukuchitiya lisungu. Ndipu tikukubiyapu chinanga ndi mbereri yimoza cha, kweni tingukuwovya kuphwere mbereri zaku. Sonu chondi tipaskeku chakurya.’

Nabala wangumuka kuti: ‘Ndingapereka cha chakurya changu ku ŵanthu nge imwi.’ Iyu wanguŵamuka mwaphuzu ukongwa ndipu wangukamba vinthu viheni vakukwaskana ndi Davidi. Ankhondu ŵa ŵati aweku anguchikambiya Davidi vosi vo Nabala wangukamba ndipu Davidi wangukwiya ukongwa. Sonu iyu wanguŵakambiya kuti: ‘Toni malipanga nginu!’ Ndipu angwamba ulendu wakuluta kuti akabayi Nabala ndi anyamata ŵaki.

Wanchitu waku Nabala yumoza yo wanguvwa mazu ngaheni ngo iyu wangukamba, wanguchikonkhoske Abigaili vo vinguchitika. Nyengu yeniyo Abigaili wanguto vakurya. Ndipu wangupinga vakurya vaki pa mahachi ndi kwambapu ulendu. Wati wakumana ndi Davidi, wangusika pa hachi ndipu wangujikama ndi kukamba kuti: ‘Chondi mungamuvwiyanga cha murumu wangu Nabala. Iyu ngwakupusa ndipu wachita vinthu vambula zeru. Londiyani chawanangwa ichi. Chondi londiyani ndipu mutigowoke chifukwa cha vo vachitika.’

Davidi wanguti: ‘Ndiwi munthukazi wazeru ukongwa. Wandiwovya kuti ndileki kumubaya Nabala, kumuwezge vinthu viheni vo wachita. Sonu luta umampha.’ Pavuli paki, Nabala wati wafwa Abigaili wanguja yumoza wa awoli aku Davidi.