Makani 60: Abigayeli a Davida
HENA ulimuzyi mukaintu ooyu mubotu uuboola kuli Davida? Izina lyakwe ngu Abigayeli. Ulijisi maano, alimwi tayandi kuti Davida acite cintu cibi. Pele katutanaiya zinji, atubone cakamucitikila Davida.
Davida accije kuli Saulu, wayuba mumpako zyamabwe. Ibanyina abamukwasyi boonse bamusangana ooko. Basankwa basika kuma 400 baboola, eelyo Davida waba musololi wabo. Kumane Davida waunka kumwami waku Mowabu wati: ‘Ndalomba kuti undilelele bataata abamaama kusikila nkabone ciya kucitika kuli ndime.’ Kuzwa waawo, Davida abantu bakwe batalika kuyuba mumalundu.
Naakamana kucita boobo, eeci nceciindi Davida naakamubona Abigayeli. Munyokwabo Nabala muntu muvwubi. Ulijisi mbelele zili 3,000 ampongo zili 1,000. Nabala muunyu. Pele mukaintu wakwe Abigayeli wakali amoyo mubotu. Alimwi ulizyi mbokucitwa cintu cibotu. Buzuba bumwi wakauvwuna mukwasyi wabo. Atubone mbwaakacita.
Davida abantu bakwe bali alubomba kuli Nabala. Alimwi bali kumugwasya kweembela mbelele zyakwe. Aboobo buzuba bumwi Davida wakatuma bantu bakwe bamwi kuli Nabala kuti akabagwasye cakulya. Bantu ba Davida basike kuli Nabala bajana kuti Nabala abagwasyi bakwe bagela mbelele boya. Bwakali buzuba bwapobwe, alimwi Nabala ulijisi zyakulya zinji zinono. Aboobo mboobu bantu ba Davida mbobaamba, bati: ‘Twali kukucitila zintu caluzyalo. Taku niiba yomwe mbelele yako njitwakabba, pele twali kuzyeembela kabotu. Akaka mwami tupe cakulya!’
Nabala wati: ‘Tandipi cakulya bantu bali mbuli ndinywe.’ Ulaambaula cakubula bulemu kumwi kafwubaazya Davida. Bajokele bamwaambila Davida, eelyo Davida wakalala kapati. Waambila bantu bakwe kuti: ‘Amubweze zipeni zyanu.’ Kumane batalika kweenda kuti bakamujaye Nabala abantu bakwe.
Umwi wabasankwa ba Nabala iwakamvwa majwi mabi Nabala ngaakaamba, wamwaambila Abigayeli cakacitika. Cakutasowa ciindi Abigayeli walibambila cakulya. Wacaanga akucibikka ambongolo kumane waunka. Asike kuli Davida, waseluka ambongolo, wafwugama wati: ‘Ndakomba mwami, utamvwi zyaamba mulumi wangu. Mufwubafwuba alimwi ulacita zintu zyabufwubafwuba. Nceeci cipego. Bweza ndakomba buya, alimwi kotujatila kuli ceeci cacitika.’
Davida wavwiila wati: ‘Uli mukaintu musongo. Wapa kuti nditajoli cibi kucibi kwiinda mukumujaya Nabala akaambo kabufwubafwuba bwakwe. Kojokela kumunzi alimwi kopona kabotu.’ Naakafwa Nabala, Abigayeli wakaba umwi wabakaintu ba Davida.
1 Samuyele 22:1-4; 25:1-43.
Mibuzyo
- Ngwani zina mukaintu uuli acifwanikiso uunka kuli Davida, alimwi mukaintu uuli buti?
- Ngwani Nabala?
- Nkaambo nzi Davida ncaakatumina bantu bakwe bamwi kuunka kuli Nabala kuti akabagwasye cakulya?
- Ncinzi ncaakaamba Nabala kubantu ba Davida, alimwi mbuti Davida mbwaakacita?
- Mbuti Abigayeli mbwaakatondezya kuti mukaintu uujisi maano?
Mibuzyo aimwi
- Bala 1 Samuyele 22:1-4.
Mbuti mukwasyi wa Davida mboupa cikozyanyo cibotu mbuli mbotukonzya kugwasyanya aumwi mubunyina bwa Bunakristo? (Tus. 17:17; 1 Tes. 5:14)
- Bala 1 Samuyele 25:1-43.
Nkaambo nzi Nabala ncaambwa kuti muntu silunya? (1 Sam. 25:2-5, 10, 14, 21, 25)
Ncinzi bamakaintu Banakristo sunu ncobakonzya kwiiya kucikozyanyo ca Abigayeli? (1 Sam. 25:32, 33; Tus. 31:26; Ef. 5:24)
Nzintu nzi zibi zyobilo Abigayeli nzyaakalesya Davida kucita? (1 Sam. 25:31, 33; Balo. 12:19; Ef. 4:26)
Mbuti mbwaakacita Davida kumajwi aa Abigayeli mbokubagwasya basankwa kubona bamakaintu mbuli mbwababona Jehova? (Inc. 21:8, 9; Balo. 2:11; 1 Pita 3:7)
Andiza Inga Mwaakkomanina Ayaaya
AMWIIYE LUSYOMO LWABO
Abigayeli—Wakacita Cabusongo
Ncinzi ncotukonzya kwiiya kumapenzi aamucikwati ca Abigayeli?
