YU SAVE long dispela naispela meri i kam bilong bungim Devit, em i husat? Nem bilong em Abigel. Em i gat gutpela tingting, na em i pasim Devit long mekim wanpela samting nogut. Paslain long yumi kisim save long dispela, yumi ken stori long ol samting i bin painim Devit.

Taim Devit i ranawe long Sol, em i go hait long wanpela hul bilong maunten. Ol brata na ol arapela long famili bilong em ol i kam i stap wantaim em. Inap 400 man olgeta i kam bung wantaim em, na Devit i kamap hetman bilong ol. Bihain, Devit i go long king bilong Moap na em i tok: ‘Plis, larim papa na mama bilong mi i stap wantaim yu inap mi painimaut wanem samting bai kamap long mi.’ Bihain, Devit na lain bilong em ol i go hait hait nabaut long ol maunten.

Bihain Devit i bungim Abigel. Man bilong Abigel, em Nabal, em i wanpela maniman na em i gat bikpela hap graun. Em i gat 3,000 sipsip na 1,000 meme. Nabal em i hatpela man. Tasol meri bilong em, Abigel, skin bilong em i naispela tru. Na tu, em i save mekim gutpela pasin. Wanpela taim em i bin helpim famili bilong em long abrusim bagarap. Orait nau yumi ken stori long olsem wanem dispela samting i bin kamap.

Devit na lain bilong em ol i mekim gut long Nabal. Ol i helpim em long lukautim ol sipsip bilong em. Olsem na wanpela taim Devit i salim sampela lain bilong em i go tokim Nabal long helpim em. Lain bilong Devit i kamap long Nabal taim em na lain bilong em i wok long katim gras bilong ol sipsip. Ol i wokim bikpela kaikai, na Nabal i gat planti gutpela kaikai. Olsem na lain bilong Devit i tok: ‘Mipela i bin mekim gut long yu. Mipela i no bin stilim wanpela sipsip bilong yu, nogat. Mipela i bin helpim yu long lukautim ol. Olsem na plis, givim sampela kaikai long mipela.’

Nabal i tok: ‘Mi no inap givim kaikai bilong mi long ol kain man olsem yupela.’ Em i mekim hatpela pasin, na mekim ol tok nogut long Devit. Taim lain bilong Devit i go bek na tokim Devit long dispela samting, Devit i kros nogut tru. Em i tokim lain bilong em: ‘Kisim bainat bilong yupela!’ Na ol i go bilong kilim i dai Nabal na lain bilong em.

Wanpela wokman bilong Nabal i tokim Abigel long ol tok Nabal i bin mekim. Olsem na kwiktaim Abigel i redim sampela kaikai. Em i putim ol kaikai antap long ol donki na em i wokabaut i go. Taim em i bungim Devit, em i lusim donki na kalap i kam daun, brukim skru na tok: ‘Plis, bikman, yu no ken tingim tok bilong man bilong mi Nabal. Em i wanpela longlong man, na em i save mekim ol longlong pasin. Em hia presen mi bringim i kam. Plis kisim dispela presen, na lusim rong bilong mipela.’

Devit i tok: ‘Yu gat gutpela tingting. Yu bin pasim mi long kilim i dai Nabal bilong bekim hatpela pasin bilong em. Yu ken i stap bel isi na go bek long haus.’ Bihain, taim Nabal i dai, Abigel i kamap meri bilong Devit.