NOMANYA omukazi ogu omurungi ati arukwija kwitirana Daudi? Ibara lye nuwe Abigairi. Akaba aine okwetegereza kw’amaani okwakonyire muno Daudi butakora ekibi. Tutakakyegereho, katubanze turole bintu ki ebibaire hali Daudi.

Hanyuma ya Daudi okwiruka kuruga hali Saulo, akesereka omubwingira. Bagenzi be hamu n’amake ge bakamweteranizaho abantu abarukuhika ha 400 bakamwizira yafooka mukuru wabu. Hanyuma, Daudi akagenda w’omukama wa Moabu yamusaba ati: ‘Leka bazaire bange baikalege naiwe hanyuma ndole kiki ekyokukora.’ Hanyuma y’eki, Daudi n’abasaija be bakatandika kwesereka omunsozi.

Hati nubwo Daudi yatangatangaine Abigairi. Iba akaba nuwe Nabali. Akaba musaija mugudda muno. Akaba aine entaama 3,000 n’embuzi 1,000. Baitu Nabali akaba musaija mufu w’enda. Baitu mukazi we Abigairi akaba murungi muno kandi akaba namanya kukora ebirungi. Omurundi gumu akakiza amaka ge. Katurole nkoku yakikozire.

Daudi n’abasaija be bakaba b’ekisa hali Nabali. Bakakonyera muno kulinda entaama ze. Kiro kimu, Daudi akatuma abasaija be hali Nabali kumusaba obukonyezi. Abasaija ba Daudi bakasanga Nabali n’abakozi be nibasara ebyoya kuruga ha ntaama. Kandi kikaba kiro ky’obugenyi. Nabali akaba aine ebyokulya bingi muno. Abasaija ba Daudi bagamba bati: ‘Tubaire bekisa hali iwe, tutaibe ntaama yawe yoona, baitu tukakonyera kuzirolerra. Bairaba tukonyere otuhe eby’okulya.’

Nabali akagamba ati: ‘Tindukusobora kuha ebyokulya byange abasaija nkainywe.’ Akabaza mumulingo gw’okwehurra kandi yabaza n’ebintu ebibi bingi muno hali Daudi. Abasaija obu bagarukireyo bagambira Daudi byoona ebibaireho, Daudi akabihiirwa muno. Daudi akagira ati: ‘Mukwate busitama zanyu!’ Nukwo bakwata omuhanda kugenda kwita Nabali n’abasaija be.

Omusaija omu wa Nabali obu yahulire ebigambo eby’emyehembo Nabali ebi yabalize, akagenda ahonaho okugambira Abigairi kiki kikaba kibaireho. Mubwangu, Abigairi akatekaniza ebyokulya. Yabiteka ha nkaina nawe yakwata omuhanda. Obu yaitiraine Daudi yaruga, ha nkaina ye yainama hansi n’okugamba: ‘Otata omutima gwawe hali iba nyowe Nabali. Mudoma kandi akora ebintu by’ekidoma. Ekisembo nkinu. Kitwale kandi otuganyire habwebyo byoona ebibaireho.’

‘Oli mukazi w’amagezi muno’ Daudi nukwo yagambire. ‘Onjunire obutaita Nabali kumusasura habw’obufu bw’endaye. Genda mubusinge.’ Hanyuma ya Nabali okufa, Abigairi akafooka omu h’abakazi ba Daudi.