ДАВИ́ДКЕ уткуй чоруп орар бо чараш херээжен кымыл, билир сен бе? Ооң адын Авиге́я дээр. Ол дыка бодамчалыг херээжен, ол Дави́дти каржы чоруктан туткан. Ынчалза-даа ооң-биле таныжып алырының бетинде, Дави́д-биле чүү болганыл, билип алыылам.

Сау́лдан дезипкеш, Дави́д куй иштинге чаштынып турар. Ынаар ооң акылары болгаш өске төрелдери кээп турар. Аңаа кээп турар кижилерниң саны 400 хире, ынчангаш Дави́д оларның баштыңчызы апарган. Ооң соонда Дави́д Моавтың хаанынга баргаш дилээн: ‘Мээң-биле чүү болурун билип алырынга чедир, мээң ачам болгаш авам сеңээ артып каарын, чөпшээреп көрем’. Ооң соонда Дави́д бодунуң улузу-биле дагларга чаштынып турар.

Бир катап Дави́д Авиге́яга таваржы берген. Ооң ашаа — Нава́л — бай чер эдилекчизи. Ол 3 000 хойлуг база 1 000 өшкүлүг. Нава́л — каржы кижи-дир. Ынчалза-даа ооң кадайы — Авиге́я — дыка чараш херээжен. Ол бодун канчаар шын алдынарын база билир. Бир катап ол өг-бүлезин безин камгалап алган. Кандыг арга-биле эвес, билип алыылам.

Дави́д база ооң улустары Нава́лга буян көргүскен. Олар ооң хойларын камгалаарынга дузалажып турганнар. Ынчангаш бир катап Дави́д Нава́лче каш кижизин чаңгыс дуза дилеп чортупкан. Дави́дтиң улустары чедип кээрге, Нава́л дузалакчылары-биле хой кыргып турган. Ол байырлал хүнү болгаш Нава́лда чаагай чем хөй турган. Ынчангаш Дави́дтиң улустары дилээн: ‘Бис сеңээ экини кылдывыс. Сээң хойларыңның чаңгызын-даа албаан бис, харын-даа оларны карактаарынга дузалажып турдувус. Ынчангаш ам биске чемден берип көрем’.

— Мен силер ышкаш кижилерге чем бербес мен,— деп, Нава́л харыылаан. Ол ону дыка каржы чугаалаан, ол ышкаш Дави́дтиң дугайында база багай чугаалап турар. Улустары ээп келгеш, шупту чүүл дугайында Дави́дке чугаалаарга, ол дыка килеңнээн. ‘Селемелерни ап алыңар!’— деп, улустарынга ол дужааган. Оон олар Нава́лды болгаш ооң кижилерин өлүрер дээш чорупкан.

Нава́лдың улустарының аразындан, ооң чугаалаан каржы сөстерин дыңнаан, бир кижи болган чүүл дугайында Авиге́яга чугаалапкан. Авиге́я ол дораан аъш-чемни чыыпкан. Ону элчигеннерге салгаш, орукче чорупкан. Дави́дти көрүп кааш, ол элчигенинден дүшкеш, аңаа мөгейгеш, чугаалаан: ‘Дээрги, өршээп көр, мээң ашаам Нава́лче кичээнгей салбайн көр. Ол бодамча чок база хөй мелегей чүүлдер кылыр кижи болгай. Бо дээрге белек-тир. Мону ап ал, ынчангаш болган чүүл дээш, бисти өршээп көр’.

— Сен — мерген угаанныг херээжен-дир сен,— деп, Дави́д харыылаан.— Меңээ кылган каржы чүүлү дээш, Нава́лды өлүреринден мени тургузуптуң. Амыр-тайбың бажыңыңче чана бер.— Сөөлзүредир Нава́л өлүп каарга, Авиге́я Дави́дтиң кадайларының бирээзи апарган.