Musadzi wa u naka ane a khou ḓa u ṱangana na Davida ni a mu ḓivha? Dzina ḽawe ndi Abigaili. U na muhumbulo wavhuḓi, o ita uri Davida a si ite tshithu tshivhi. Fhedzi ri sa athu u guda izwo, kha ri vhone uri ho vha hu tshi khou iteani kha Davida.

Davida o no shavha Saulo, a dzumbama bakoni. Vhakomana vhawe na muṱa wawe woṱhe vha mu tevhela. Vhanna vha linganaho 400 vha ḓa khae, Davida a vha murangaphanḓa wavho. Zwenezwo Davida a ya kha khosi ya Moaba a ri: ‘Ndi humbela uri khotsi anga na mme anga vha dzule na iwe u swika ndi tshi vhona uri hu itea mini kha nṋe.’ Ene na vhanna vhawe vha dzumbama dzithavhani.

Ndi nga murahu ha zwenezwo he Davida a ṱangana na Abigaili. Munna wawe Nabali o vha e muṋe wa shango o pfumaho. O vha e na nngu dza 3 000 na mbudzi dza 1 000. Nabali o vha a tshi dzimana. Fhedzi musadzi wawe Abigaili o vha o naka. Hafhu, o vha a tshi ḓivha u ita zwo lugaho. O vhuya a tshidza muṱa wawe. Kha ri vhone.

Davida na vhanna vhawe vho vha vhe na vhulenda kha Nabali. Vho thusa u tsireledza nngu dzawe. Ḽiṅwe ḓuvha Davida a ruma vhaṅwe vha vhanna vhawe u humbela thuso kha Nabali. Vhanna vha Davida vho ya kha Nabali musi ene na vhathusi vhawe vha tshi khou vheula wuḽu kha nngu. Ḽo vha ḽi ḓuvha ḽa tshimima, Nabali e na zwithu zwinzhi zwavhuḓi zwa u ḽa. Vhanna vha Davida vha ri: ‘Ro vha na vhulenda kha iwe. A ro ngo tswa nngu dzau, fhedzi ro thusa u dzi lisa. Zwino, ri humbela-vho zwiḽiwa.’

Nabali a ri: ‘Ndi nga si fhe vhanna vha ngaho vhoinwi zwiḽiwa zwanga.’ A amba nga u dzimana, a amba zwivhi nga ha Davida. Musi vhanna vha tshi vhuya vha tshi vhudza Davida nga hazwo, Davida a sinyuwa zwihulu. A vhudza vhanna vhawe: ‘Hwalani mabanga aṋu!’ Vha ya uri vha vhulahe Nabali na vhanna vhawe.

Muṅwe wa vhanna vha Nabali, we a pfa maipfi a u dzimana a Nabali, a vhudza Abigaili zwo iteaho. Nga u ṱavhanya Abigaili a lugisa zwiḽiwa. A zwi hwesa dzimbongola a dzhena nḓilani. A tshi ṱangana na Davida, a tsa kha mbongola yawe, a gwadama a ri: ‘Mune wanga, u songo londa munna wanga Nabali. Ndi tsilu, nahone u ita zwa vhutsilu. Tshifhiwa ngetshi. Tshi dzhie nandi, u ri hangwele zwe zwa itea.’

Davida a fhindula: ‘U musadzi o thanyaho. Wo ita uri ndi si vhulahe Nabali nda mu lifhedza u dzimana hawe. Iya hayani nga mulalo.’ Nga murahu, musi Nabali o no fa, Abigaili a vha muṅwe wa vhasadzi vha Davida.

1 Samuele 22:1-4; 25:1-43.