KILALA mo ba an mahusay nga babaye nga natapo kan David? Abigail an iya ngaran. Maaramon hiya, ngan ginpugngan niya hi David ha pagbuhat hin maraot. Kondi, antes naton mahibaroan ito, aton anay pag-istoryahan kon ano an nahitatabo kan David.

Han pinalagiw hi David tikang kan Saul, nagtago hiya ha usa nga lungib. Inupod ha iya an iya kabugtoan ngan an iba pa han iya pamilya. Ha kabug-osan, mga 400 nga kalalakin-an an inupod ha iya, ngan hiya an nagin lider nira. Katapos, kinadto hi David ha hadi han Moab ngan nagsiring: ‘Tuguti an akon tatay ngan nanay nga lumungon ha iyo, nanginginyupo ako, tubtob nga mahibaroan ko kon ano an mahitatabo ha akon.’ Paglabay han panahon, nagtago ha kabungtoran hi David ngan an iya kasundalohan.

Katapos hini nga panhitabo, nakilala ni David hi Abigail. An iya bana nga hi Nabal, riko ngan haluag an katunaan. Hi Nabal may-ada 3,000 nga karnero ngan 1,000 nga kanding. Mapintas hiya, kondi an iya asawa nga hi Abigail mahusay hinduro ngan maaram kon ano an husto nga pagbubuhaton. Usa ka beses, gintalwas pa ngani ni Abigail an iya pamilya. Aton kitaon kon paonan-o.

Hi David ngan an iya kasundalohan mabinuligon kan Nabal. Binulig hira ha pagpanalipod han iya kakarnerohan. Salit usa ka adlaw, ginsugo ni David an pipira han iya kasundalohan nga mangaro hin bulig kan Nabal. Nagkaabot an kasundalohan ni David samtang nagpipinangarot han kakarnerohan hi Nabal ngan an iya mga kabulig. May-ada daku nga panagtawo hira Nabal, salit damu an ira pagkaon. Ini an ginsiring han kasundalohan ni David: ‘Nagin buotan kami ha imo. Waray kami ginkawat nga bisan usa han imo mga karnero, kondi binulig kami ha pagbantay hito. Nanginginyupo kami, tagi kami hin pagkaon.’

‘Diri ako mahatag hin pagkaon ha mga tawo nga pariho ha iyo,’ siring ni Nabal. Mapintas hiya magyakan, ngan ginpakaraot niya hi David. Han binalik an kasundalohan ni David ngan ginsumatan hiya han nahitabo, nasina gud hiya. ‘Itaklos an iyo mga espada!’ siring niya ha iya kasundalohan. Ngan linakat hira basi kadtoon ngan patayon hi Nabal ngan an iya mga kabulig.

An usa nga kabulig ni Nabal, nga nakabati han iya mapintas nga ginyakan, nagsumat kan Abigail han nahitabo. Nag-andam dayon hi Abigail hin pagkaon. Iginkarga niya ito ha mga asno ngan nagbyahe. Han iginkatapo niya hi David, hinaw-as hiya ha asno, hinapa ngan siniring: ‘Nanginginyupo ako, ginoo ko, ayaw tagda an akon bana nga hi Nabal. Diri maopay an iya panhunahuna, ngan nagbubuhat hiya hin kalurongan. May-ada ako dara nga regalo. Alayon karawata ini, ngan pasayloa kami ha nahitabo.’

‘Maaramon ka nga babaye. Ginpugngan mo ako ha pagpatay kan Nabal tungod han iya kapintas. Uli nga mamurayawon,’ siring ni David. Paglabay han panahon, han namatay hi Nabal, hi Abigail nagin usa han mga asawa ni David.