Tantara 60

Abigaila Ndreky Davida

HAINAO man̈angy tsarabe fanôjy Davida io? Abigaila an̈arany. Izy man̈angy misain̈y, baka iô koa izy nisakana Davida tsy han̈ano raha ratsy. Atsika baka iô mbala hianatra raha mikasiky zen̈y, fa alô antsendriky atsika hizaha raha nahazo Davida.

Davida koa fa nilefa Saoly in̈y, izy nisitriky tan̈aty lava-bato. Ry havany jiaby nan̈araka izy tan̈y. Nisy 400 lahy koa nan̈araka izy tan̈y, ke Davida nanjary mpitariky irô. Davida amy zay nandeha tamin’ampanjakan’i Moaba, nivolan̈a: ‘Alô kony babako ndreky mamako apetrako aminarô eto antsendriky, fa tsendriky haiko raha hahazo zaho ty.’ Davida ndreky olonany aby in̈y amy zay nisitriky tamy bongo tan̈y.

Tafaran’izin̈y, Davida fanôjy Abigaila. Vadiny, lelahy mpan̈arivo ndreky manan̈a tany maro. Nabala an̈arany. Izy nanan̈a ôndrikôndriky 3 000 ndreky bengy 1 000. Nabala io matity. Abigaila io man̈angy zatôvo, sady mahay mandamin-draha. Efa nahavita namonjy fianakavian̈anany izy tandraraiky zay. Alô zahavatsika karakôry nan̈anaovany zen̈y.

Davida ndreky olonany aby io tsara fan̈ahy tamy Nabala. Irô nitatahy izy niaro ôndrikôndrikinany. Ke andra araiky amy zay, Davida nan̈iraka lelahy sasany hangataka vonjy tamy Nabala. Irô koa fa navy tan̈y, tôjy Nabala ndreky ampiasanany manapaka volovolon’ôndrikôndriky. Fety andra tamy zen̈y, ke feno hanin̈y tamy tran̈on’i Nabala tao. Olon’i Davida aby io nivolan̈a kara’ty: ‘Zahay fa tsara fan̈ahy taminao. Zahay tsy nangalatra ôndrikôndrikinao, fa nan̈ampy anao hiambin̈y irô. Ke zahay mba mangataka hanin̈y e.’

Nabala nivolan̈a: ‘Hanin̈inakahy baka tsy hamiako olo karaha anarô io.’ Aviô izy nankaratsy Davida. Olo aby io koa fa nimpody tamy Davida tan̈y nitantara raha jiaby zen̈y, Davida neloko mare. Volan̈iny tamin’olonany: ‘Samia mangala mesobe!’ Irô amy zay lôso, handeha hamono Nabala ndreky olonany jiaby.

Olon’i Nabala araiky koa fa naharen̈y volan̈a Nabala in̈y, nitantara tamy Abigaila. Abigaila niaraka naharen̈y izin̈y, namory hanin̈y nalaky. Nataony tan̈abo boriky maromaro amy zay hanin̈y aby zen̈y, baka iô izy nitenginy boriky koa. Izy koa fa nandeha, fanôjy Davida. Izy nijotso, nankôhoko tamy Davida. Volan̈iny: ‘Aza fady tompôko anao, kaza jiren̈a volan̈a vadiko taminao in̈y e. Izy fa adala, ke raha jiaby ataony tsisy manjary. Ty misy raha amianay, ke mba alaivanarô izy ty e. Zahay mangataka paridaon amin’adisovan̈a jiaby in̈y.’

Davida nivolan̈a taminany: ‘Anao ten̈a man̈angy misy jery. Anao nahavita nisakana zaho tsy hamaly raha ratsy nataon’i Nabala. Mindao mody, fa kaza miasa loha eky.’ Tsy ela tafaran’izin̈y, naty Nabala, Abigaila amy zay nanjary vadin’i Davida koa.

1 Samoela 22:1-4; 25:1-43.