ANA akummanyilila jwamkongwe jwakusalala mnope jwakwisa kukucingangana ni Daudi? Lina lyakwe lili Abigayeli. Jwalakwe ali jwaganisya cenene, soni akumkamucisya Daudi kuti akatenda cindu cakulemweceka.

Daudi patisile kwa Sauli, akuuŵa kumbanga. Acabalegwe, soni liŵasa lyakwe lyosope likuuŵasoni kumbangako. Ciŵandika ŵandu ŵakwana 400 ali ni jwalakwe, soni Daudi akuŵa mlongola jwawo. Kaneko Daudi akwawula kwa mwenye jwa ku Mowabu nikuŵeceta najo kuti: ‘Conde asunjile baba ni mama ŵangu mpaka ndole yaciyindendecele.’ Kaneko Daudi ni acalume ŵaŵaliji ni jwalakwe akutanda kuuŵa m’matumbi.

Kaneko Daudi akucingangana ni Abigayeli. Abigayeli ali ŵamkwakwe Nabala jwakwete malo gamakulungwa, soni ali mundu jwakusicila. Akwete ngondolo syakwana 3,000 ni mbusi 1,000. Nabala ali mundu jwakusakala mtima. Nambo Abigayeli ŵamkwakwe ali jwamkongwe jwakusalala mnope. Soni akusamanyilila kutenda yindu yambone. Pandaŵi jine akukulupusya liŵasa lyakwe. Kwende tulole muŵatendele yeleyi.

Daudi ni acalume ŵaŵaliji nawo aŵele mkumtendela Nabala yindu yambone. Amkamucisye kuteteya ngondolo syakwe. Lisiku line Daudi akutumisya acalume ŵakwe ŵane kwa Nabala kukuŵenda cikamucisyo. Acalume ŵa Daudi ŵala akwika kwa Nabala pandaŵi jele jwalakwe ni ŵamasengo ŵakwe ŵasengaga ngondolo manyunya. Lili lisiku lya cindimba, m’yoyo Nabala akulinganya yindu yejinji yakuti alye. Sambano acalume ŵa Daudi ŵala akuŵeceta kuti: ‘Tuŵele mkwatendela wawojo yambone. Nganitujiŵa ngondolo syawo atamose jimo, nambo tuŵele mkukamucisya kusisamalila. Sambano, conde, atugayile yakulya.’

Nabala akwanga kuti: ‘Une ngapeleka yakulya yangu kwa ŵandu mpela jemanja.’ Jwalakwe akuŵeceta mwacipongwe, soni akum’ŵecetela Daudi yakusakala. Acalume ŵala pawusile nikumsalila Daudi yaŵecete Nabala, Daudi akutumbila nayo mnope. Jwalakwe akwasalila acalume ŵakwe kuti: ‘Ataŵilile maupanga gawo!’ Kaneko akuwutanda ulendo wakwawula kukum’wulaga Nabala ni acalume ŵakwe.

Jumo jwa acalume ŵa Nabala, jwaŵapikene maloŵe gacipongwe gaŵaŵecete Nabala, akumsalila Abigayeli yayitendekwe. Ndaŵi jijojo Abigayeli akusonganganya yakulya kuti akampe Daudi. Akupacila pa abulu nikuwutanda ulendo. Pakucingangana ni Daudi, jwalakwe akutuluka pa bulu jwakwe, nikutindiŵala kaneko akuŵeceta kuti: ‘Pepani, ambuje, akayikosya yaŵecete ŵamkwangu Nabala. Ali jwakuloŵela, soni akusatenda yindu yakuloŵela. Mtuka wawo awu. Conde ajigale, soni atukululucile ligongo lya yayitendekweyi.’

Daudi akwanga kuti: ‘Mmwe mli jwamkongwe jwalunda. Mungamucisye kuti ngam’wulaga Nabala ligongo lya cipongwe cakwe. Jawulani kumangwenu mwamtunjelele.’ Kaneko, Nabala pawile, Abigayeli akuŵa jumo jwa acakongwe ŵa Daudi.