Historia 60

Abigail ne David

RUNIBIAʼLUʼ baʼdudxaapaʼ sicarú zeeda ra nuu David ca la? Labe Abigail. Laabe guizáʼ nuu xpiaanibe ne rucueezabe David guni xiixa ni cadi xneza. Peru ante gúʼyanu xi laani la? chiguidúʼyanu cani zeeda guizaaca David.

Bixooñeʼ si David de Saúl la? bicachilube ndaaniʼ ti cueva. Ca bíʼchibe ne xcaadxi de ca binnilídxibe reedacaʼ ra nuube. Ne reeda biaʼ tapa gayuaa hombre, ne David reeda gaca xaíque stícabe. David riebe ra nuu rey stiʼ guidxi Moab ne rábibe laa: Guiaana laʼ bixhozeʼ ne jñaa ra nuuluʼ dede ora guuyaʼ xi guizaacaluáʼ. Despué la? David ne ca hombre stiʼ rucachilucaʼ lade guiʼxhiʼ.

Gupa dxi, David binibiaʼbe Abigail. Xheelaʼ Abigail nga Nabal, ti hombre napa stale bidxiichi ne stale layú. Nápabe 3.000 dendxuʼ ne 1.000 chiva. Nabal guizáʼ malu laa. Peru xheelabe Abigail nabé galán laa, ne nanna guni ni xneza. Ti tiru dede bilabe ca binnilídxibe. Chiguidúʼyanu ximodo.

David ne ca hombre stiʼ gúcacaʼ nachaʼhuiʼ ne Nabal. Gucanécabe laabe guiaapaʼ ca dendxuʼ stibe. Ti dxi la? David ruseendabe ca hombre stibe para chinábacabe Nabal ti favor. Laacabe yendácabe ra nuu Nabal laga laabe ne ca mozo stibe cugácabe guicha ladi ca dendxuʼ que. Ca dxi que nápacabe saa ne Nabal napa stale guendaró. Ngue runi na ca hombre stiʼ David: Maʼ gúcadu nachaʼhuiʼ ne lii, qué nibánadu nin ti sténdxuluʼ sínuque gucanedu lii guiáʼpacame. Yanna bisigaʼdeʼ laʼ laadu caadxi guendaró.

Nin qué zudiéʼ guendaró hombre casi laatu, na Nabal. Ricabi laacabe naduxhuʼ ne riníʼ mal de David. Ora ca hombre que rábicabe David ni guca riʼ la? David guizáʼ ridxiichi, ngue runi rábibe ca hombre que ¡Laguicaa guiibaʼ duxhuʼ stitu! Óraque rireecabe para chiguuticabe Nabal ne ca hombre stiʼ.

Peru ora binadiaga tobi de ca xpinni Nabal modo caníʼ Nabal que la? gudxicabeni Abigail. Oraqueca gucuaa Abigail stale guendaró ne rudxiibabe cani deche caadxi burru ne riebe. Ora ridxagalube David la? riétebe deche burru stibe, rindeteʼ íquebe ne rábibe David: Cadi gulábiluʼ xheelaʼ Nabal purtiʼ laabe nahuátibe ne rúnibe puru si guendahuati. Raríʼ niáʼ caadxi guendaró para gusegaʼdeʼ lii, gucuaa ni ne bitiidilaʼdxiʼ guiráʼ ni maʼ guca.

Aque nuu xpiaanuʼ xa, na David rabi laabe. Maʼ bicueezu naa de ñuuteʼ Nabal pur guendaquéiquiiñeʼ stiʼ. Yanna bibiguetaʼ raliʼdxuʼ ne guendariuudxi. Guti si Nabal la? Abigail reeda gaca tobi de ca xheelaʼ David.

1 Samuel 22:1-4; 25:1-43.