¿RIMBULO gonaʼ móz ni sidguen a David la? Laabu Abigail. Láabu naní xcalrriembu, né racaabu David par diti gony toib cós mal. Par labúu ganno xigony cayonybu ndeʼ, nír guisuidyno xí ni cayac né David.

Diti xidzú de goló bixony David de Saúl, láabu racachlanbu lainy toib bileʼ. Buchbu né stipnés xfamilybu rieed ridguen láabu. Láaca 400 buñguieeu rieed ronoʼbu, né David rasanir nislóyibu. Ór cú David riée ronoʼ buñguieeu ni rony mandary gudx Moab né raibybu buñguieeu reʼ: Ranába lólo, biduidy lagary que bixiosa né xinaʼya guiaʼan reʼ ronoʼlo hasta órni gann xí gac né naʼ. Ór cú, David né guirá buñguieeu ni noʼ né láabu rasaló racachlanyibu guiʼix.

Radudy tidxo dzú, David rimbu Abigail. Tzeʼel Abigail laa Nabal, láabu nac toib buñguieeu ric ni nap xiroʼ layoo. Napbu 3,000 xiil né 1,000 chiv. Nabal nigolú nagudx xcalnabanybu. Per tzeelbu Abigail nigolú móz nac. Láaca nambu ronybu xinésni. Toibtica buelt hasta bilaabu xhomilbu. Guibino ximod bunybu láani.

David né guirá buñguieeu buñtzay góc portín gonyibu xiil xtuny Nabal. Toibtica dzú David bixel tipnés buñguieeu ni noʼ né láabu par ñeyibu nanabyibu lóo Nabal cós ni caquiinyibu. Layibu radxiinyibu ronoʼ Nabal laʼga buñguieeu reʼ né xomós cagaayibu laidy xiil. Nabal noʼbu ló lanii né napbu xiroʼ galrro par guá buñ. Por ngú buñguieeu ni raxel David raniyibu: Lóodo ma gócdo buñtzay né looy. Diti golanndo ni toib xiil ni naplo, per gocnédo looy gopdo layimu. Ranabdo lólo, biscat tidxo galrro lóodo.

Nabal raniʼ: Diti sadudi galrro a buñ xomod lóoto. Nachóng rony xtiitzbu né ranibu cós mal de David. Órni guirá buñguieeu reʼ raibyibu David ni gosacloyibu, David nigolú radzuitz né ranibu: ¡Colguicaʼ espad ni naptó! Né ranásyibu néz par tzagaityibu Nabal né guirá buñguieeu ni noʼ né láabu.

Toibtica xomós Nabal bicadiag guirá diitz nachóng ni goní Nabal, né rigudxbu guiráni Abigail. Órcuca Abigail ronytzaay galrro, ragoʼoybu láani laidy tipnés xporbu né ranásbu néz. Órni radzaglóo saʼyibu ló néz, Abigail rietj laidy xpor, riachcaʼdabu né ranibu: Ranába lólo, diti colcuent ni goní Nabal tzeʼela. Toib buñ ngaʼal láabu, né cuenunysi ronybu. Cuaʼ ni cascada looy. Ranába lólo cuaʼ láani, né bituidy xcalkiédo scásiʼ.

David racapy, nacloʼ toib buñgonaʼ ni naní xcalrrien. Ma bicaalo naʼ par diti guigaity Nabal por guirá cós mal ni bunybu lóodo. Nigoreʼ bibiguet lidxlo goxt. Órni Nabal raity, Abigail radxiin rac toibtica tzeʼel David.