WASITAMPIW Saulax Davitar katjañ munäna. 3.000 ajllit soldadonakampiw thaqhir sarapxäna. Davitax uk yatisaxa uñaqanak khitäna kawkjarus Saulax arumax samarani uk yatiñataki. Ukat pä soldadonakaparux akham sasaw jisktʼäna: ‘¿Khitis nayampi chika Saulan ukaru sarañ muni?’ sasa.

‘Nayaw jumamp sarä’ sänwa Abisai waynaxa. Abisayax Seruyan yuqapänwa, Seruyasti Davitan kullakapänwa. Ukat kunapachatï Saulampi soldadonakampi ikirasipkäna ukhaxa, Davitamp Abisayampiw jamasat ikiraskir taypir mantapxäna. Saulan chʼijmapatxa lanzapampi umañ wakullapamp apxarusiwayapxäna. Janiw khitis uñjkänti ni istʼkänsa, taqiniw ikirasipkäna.

Davitampir Abisayampir uñtma. Qullu patxaruw tʼijsupxäna. Davitax akham sasaw israelit soldadonakan pʼiqtʼiriparux säna: ‘Abner, ¿kunatarak Saúl tatarusti jan sum uñjktasti? ¿Lanzapampi umañ wakullapampix kawkinkarakisti?’ sasa.

Saulax ikit sartäna. Davitan arnaqasitap amuyäna, ukat akham jisktʼäna: ‘¿David, jumätati?’ sasa. ¿Abnerampir Saulampirux aka aynachan uñjtati?

‘Jïs tata, nayätwa’ sänwa Davitaxa. Ukat akham sasaw Davitax jisktʼäna: ‘¿Kunatsa katjañ munista? ¿Kuna jan walcha lurtxa? Tata, akäskiw lanzamaxa. Aptir khitis jutpan’ sasa.

‘Jan walwa lurtxa. Pisi chuym jaqir uñtataw sarnaqtxa’ sänwa Saulaxa. Ukat Davitax sarawayxänwa, ukat Saulas utaparuw kuttʼxarakïna. Davitax chuymapan akham amuyäna: ‘Saulax jiwayakipunitaniwa. Filistea markar sarxañajawa’ sasa. Ukat ukaruw sarxäna. Davitax filisteonakaruxa jupanak tuqitsa saytʼasxaspa ukham amuyayäna.

Ukat mä qhawqhatxa israelitanakamp nuwasiriw filisteonakax jutapxäna. Ukansti Saulampi, Jonatanampiw jiwapxäna. Uk yatisaxa Davitax wal llakisïna, ukatwa mä suma qʼuchu qillqäna, ukat akham sasaw qʼuchtʼäna: ‘Jonatán jilaja, jumatjamax wali llakitaw uñjasta. ¡Walpuni munasiyäsma!’ sasa.

Uk pasxipanxa Israelaruw Davitax kuttʼanxäna, Hebrón sat markaru. Ukansti khitis apnaqirïnix uka tuqitwa Saulan Isboset yuqapar apnaqirit uttʼayañ munirinakampi Davitar uttʼayañ munirinakampix chʼaxwarapxäna. Ukat Davitan yanapirinakapaw atipapxäna. 30 maranïkän ukhaw Davitar apnaqirit uttʼayapxäna. Paqallq mara chikataniw Hebronan apnaqäna. Hebronankkasinxa Amnón, Absalón, Adonías sat wawanakanïxänwa.

Tiempompixa, Davitampi yanapirinakapampix Jerusalén sat mä suma marka katuntiriw sarapxäna. Davitan Seruya kullakapan Joab sat yaqha yuqapaw ukan pʼiqtʼäna. Ukatwa soldadonakar pʼiqtʼirit uttʼayäna. Ukat Davitax Jerusalenan apnaqxäna.