PINURBARAN liwat ni Saul na hanapon si David. Iniba niya an 3,000 sa pinakamatitibay niyang suldados. Kan maisihan ini ni David, nagsugo siya nin mga espiya para aramon kun sain nagkampo si Saul asin an mga tawuhan kaini. Sinabi ni David sa duwang tawuhan niya: ‘Si’say saindo an maiba sako sa kampo ni Saul ngunyan na banggi?’

‘Ako,’ an simbag ni Abisai. Siya an aki kan tugang na babayi ni David na si Zeruia. Mantang turog si Saul asin an mga tawuhan niya, luway-luway na nagkamang si David asin Abisai pasiring sa kampo. Kinua ninda su garod * asin laganan nin tubig ni Saul, na nasa pamayuhan niya. Warang nakahiling o nakadangog sainda dahil nanok an turog kan gabos.

Nahihiling mo si David saka Abisai? Nakarayo na sinda asin nasa itaas nin bulod. Kinurahawan ni David an hepe kan hukbo nin Israel: ‘Abner, ano ta dai mo pigbabantayan an kagurangnan mong hadi? Hain an garod saka laganan niya nin tubig?’

Nagimata si Saul. Nahihiling mo siya saka si Abner sa ibaba? Nabosesan ni Saul si David, kaya naghapot siya: ‘Ika iyan, David?’

‘Iyo po, kagurangnan ko,’ an simbag ni David. Tapos, naghapot siya: ‘Ta’no ta gusto nindo akong dakupon? Anong sala ko? Mahal na hadi, uni tabi su garod mo. Ipakua nindo sa tawuhan nindo.’

‘Nasala ako,’ an pag-ako ni Saul. ‘Kamangmangan an piggigibo ko.’ Dangan naghali na si David, asin nagpuli na si Saul. Pero sa buot-buot ni David, ‘Tibaad matiyempuhan ako ni Saul, tapos gadanon ako. Madulag ako pasiring sa lugar kan mga Filisteo.’ Iyan an ginibo niya. Nalansi niya an mga Filisteo asin napaniwala sindang kasurog na ninda siya.

Paghaloy-haloy, sinalakay kan mga Filisteo an Israel. Sa nangyaring ralaban, parehong nagadan si Saul asin Jonathan. Munduon kaini si David, asin naggibo siya nin magayon na awit, na diyan sinabi niya: ‘Nagtatangis ako saimo, tugang kong Jonathan. Padangat takang marhay!’

Pagkatapos, nagbalik si David sa Israel, sa siyudad nin Hebron. Nagkaigwa nin giyera ta gusto kan iba na maghadi si Isboset na aki ni Saul, pero an iba si David an gusto. Sa katapos-tapusi, nanggana an mga tawuhan ni David. Treynta anyos si David kan magin hadi siya. Pito may kabangang taon siyang naghadi sa Hebron. Kan panahon na iyan namundag an mga aki niyang si Amnon, Absalom, asin Adonias.

Pag-abot nin panahon, nasakop ni David asin kan mga tawuhan niya an magayon na siyudad nin Jerusalem. Si Joab, saro pang aki kan tugang ni David na si Zeruia, an nanginot sa ralaban. Bilang balos, ginibo siya ni David na hepe kan hukbo. Nagpuon na si David na mamahala sa Jerusalem.