SAUL afiak odomo ndimụm David. Enye ada n̄kpọsọn̄ mbon ekọn̄ esie 3,000 adaha ndiyom enye. Ke David ọfiọkde emi, enye ọdọn̄ mbon uyep ẹkẹfiọk ebiet Saul ye ikọt esie ẹnamde nna ke okoneyo oro. Ekem David obụp ikọt esie iba: ‘Anie ke otu mbufo edika nna Saul ye ami?’

‘A·bishʹai ọbọrọ, ‘Nyeka.’ A·bishʹai edi eyen eyeneka David an̄wan, Ze·ruʹiah. Ke Saul ye ikọt esie ẹdede, Da­vid ye A·bishʹai ẹnyọni ndịbe ndịbe ẹdụk nna. Mmọ ẹmen eduat Saul ye otu mmọn̄ esie, emi anade ekpere ibuot Saul. Baba owo ikwe mme ndikop koro kpukpru ẹtịm ẹde.

Sese David ye A·bishʹai ke emi. Mmọ ẹdaha, ndien ẹdu ke enyọn̄ obot ke ifụre. David ofiori okot etubom ekọn̄ Israel: ‘Abʹner, Nsinam afo mukpemeke ete fo, edidem? Sese! Enye eduat ye otu mmọn̄ esie?’

Saul edemede. Enye ọdiọn̄ọ uyo David, ndien obụp: ‘Nte afo edi oro, David?’ Nte emekeme ndikụt Saul ye Abʹner do ke idak?

David ọbọrọ Saul ete, ‘Ih, ọbọn̄ mi edidem.’ Ndien David obụp: ‘Ntak afo oyomde ndimụm mi? Nso idiọkn̄kpọ ke n̄kanam? Se eduat fo mi, O edidem. Yak kiet ke otu mme owo edibọ enye.’ Saul onyịme ete, ‘Mmanam idiọk.’ ‘Mmanam ndisịme n̄kpọ.’ Ye oro, David ọnyọn̄ esie ndien Saul afiak ọnyọn̄. Edi David ọdọhọ idemesie ete: ‘Usen kiet, Saul oyowot mi. Akpana mfehe n̄ka idụt mme Phi·lisʹtine.’ Ndien oro ke enye anam. David ekeme ndibian̄a mme Phi·lisʹtine nnyụn̄ nnam mmọ ẹnịm ẹte imọ idu ke emi ye mmọ.

Ekem ke ndusụk ini, mme Phi·lisʹtine ẹdọk ndin̄wana ye Israel. Ke ekọn̄ oro, ẹwot Saul ye Jonʹa·than. Emi anam David otịm ọfụhọ, ndien enye ewet edinem ikwọ, emi enye ọkwọde: ‘Mọfụhọ mban̄a fi eyenete mi Jonʹa·than. Se nte afo akamade mi!’

Ke emi ebede, David afiak ke Israel aka obio Heʹbron. Ekọn̄ odu ke ufọt mme owo oro ẹmekde eyen Saul Ish-boʹsheth ndidi edidem ye mme owo efen ẹyomde David edi edidem. Edi ke akpatre, ikọt David ekan. David edi isua 30 ke ẹnamde edi edidem. Ke isua itiaba ye ubak, enye akara ke Heʹbron. Ndusụk nditọ oro ẹmanade ẹnọ enye do ẹkere, Amʹnon, Abʹsa·lom ye Ad·o·niʹjah.

Ini edi oro David ye ikọt esie ẹkade ndida ediye obio oro ẹkotde Jerusalem. Joʹab, eyen Ze·ruʹiah efen, eyeneka David an̄wan ada iso ke ẹn̄wan. Ntre David ọnọ Joʹab utịp ke ndinam enye etubom ekọn̄ esie. Ke emi, David ọtọn̄ọ ndikara ke obio Jerusalem.