SAULO ese Davida ia dogoatao toho lou. Ena tuari taudia namodia 3,000 ia abia bona ia lao Davida tahua totona. Davida be unai ia diba neganai, spai taudia haida ia siaia Saulo bona ena tatau edia kamepa ia diba totona. Bena Davida ese ena tatau rua ia nanadaia: ‘Daika be lau danu Saulo ena kamepa dekenai do ia lao?’

Abisai ia haere: ‘Lau.’ Abisai be Davida ena taihuna Seruia ena natuna. Saulo bona ena tatau idia mahuta noho lalonai, Davida bona Abisai be metairametaira edia kamepa dekenai idia vareai. Saulo ena io bona ena ranu hodu be ena kwarana badina amo idia abia. Ta ese idia ia itaia eiava kamonaia lasi, badina idia ibounai idia mahuta mase.

Davida bona Abisai mani oi itaia. Idia heau giroa, bona ororo ta ataiai idia gini. Davida be Israela ena tuari biaguna dekenai ia boiboi: ‘Abinere e, dahaka dainai emu lohia, emu king tauna unai, oi gimaia lasi? Itaia! Ena io bona ranu hodu be edeseni?’

Saulo ia noga. Davida ena gadona ia diba, bona ia henanadai: ‘Davida, unai be oi, a?’ Henuna kahana dekenai Saulo bona Abinere oi itaia, a?

Davida be Saulo dekenai ia haere: ‘Oibe, egu lohia, king e.’ Bona Davida ia henanadai: ‘Dahaka dainai lau oi dogoatao gwauraia? Egu kerere be dahaka? King e, oiemu io be inai. Emu tau ta oi siaia mai bona do ia abia.’

Saulo ia gwau, ‘Lau kerere vadaeni. Lau be kavakava momokani.’ Bena Davida be ena dala dekenai ia lao, bona Saulo be ruma dekenai ia giroa lou. To Davida ia laloa: ‘Dina ta Saulo ese lau do ia alaia. Namona be Pilistia taudia edia gabu dekenai lau heau.’ Bona, unai bamona ia karaia. Davida ese Pilistia taudia ia koia bona idia laloa ia be edia kahana dekenai ia hanaia vadaeni.

Nega sisina murinai Pilistia taudia idia daekau Israela taudia idia tuari henia totona. Unai tuari lalonai, Saulo bona Ionatana ruaosi idia hamasea. Unai dainai Davida ia lalohisihisi bada, bona ane namo hereana ta ia torea, ane ena hereva be inai: ‘Egu kakana Ionatana e, oi dainai lau lalohisihisi bada. Lau ese oi lau lalokau henia bada!’

Unai murinai Davida be Israela ena hanua ta Heberona dekenai ia giroa lao. Saulo ena natuna Isiboseta ia king totona idia abia hidi taudia bona idia ura Davida ia king taudia huanai tuari ia vara. To gabeai, Davida ena tatau idia kwalimu. Davida be king ai idia halaoa neganai, ena mauri lagani be 30. Heberona dekenai lagani 7 bona hua 6 ia lohia. Unuseniai idia vara memerodia edia ladadia be Aminona, Abesaloma bona Adonaisa.

Nega ia ginidae Davida bona ena tatau be hanua hairaina ladana Ierusalema idia abia totona. Davida ena taihuna Seruia ena natuna ma ta, Ioaba, ese tuari ia gunalaia. Unai dainai Davida ese Ioaba ia hanamoa bona ena tuari taudia edia biaguna ai ia halaoa. Unai neganai, Davida be Ierusalema hanua ia lohiaia matamaia.