David ma zikwa otjombara
EHUNGI 61
David ma zikwa otjombara
SAUL wa kondjisa okukambura David rukwao. Eye wa toora ovarumendu 3000 ovarwe ovasembasemba na i okukemupaha. Indu David tja zuva ohunga na ihi, eye wa hinda ozohoze okukakonḓonona kutja Saul novandu ve va tono pi ozondanda zawo ouṱuku mbo. Okuzambo David wa pura vevari wovandu ve: ‘Oune pu eṋe ngu ma i puna ami kozondanda zaSaul?’
Abisai we mu zira na tja: ‘Ami me i.’ Abisai omuzandu womuṱena waDavid Seruja. Ngunda Saul novandu ve ava rara, David na Abisai va honina kumwi mondanda. Owo va toora enga raSaul nondjupa ye yomeva, ndja ri meṋe yotjiuru tjaSaul. Kape na ngwe ve muna poo okuvezuva mena rokutja avehe va rarere ozomboṱu ozonḓeu.
Tara David na Abisai nambano. Owo va henauka nokuhina otjipo nu ve ri kombanda yotjivanda. David wa ravaera komuhona worupa rwaIsrael rwovita natja: ‘Abner, omena ratjike tji u hi nakuṱakamisa omuhona woye, ombara? Tara! Enga re nondjupa ye yomeva vi ri pi?’
Saul wa penduka. Eye wa zemburuka eraka raDavid, na pura: ‘Oove David?’ Saul na Abner mo ve munu kehi mbe na?
David wa zira Saul: ‘Ii, muhona wandje ombara.’ Nu David wa pura: ‘Omena ratjike tji mo kondjisa okundjikambura? Otjiṋa otjivi tji mba tjita otjikeṋa? Enga roye orondi, mbara. Omurumendu umwe weṋu nge ye okurieta.’
Saul we mu zira: ‘Ami mba tjita ouvi, ami mba tjita ouyova.’ Nungwari David we rihungirira ku ye omuini natja: ‘Rimwe romayuva nga Saul tjiri me ndji zepa. Ami me sokutaurira kehi rOvafilisti.’ Nu otja tjita. David wa yenena okuwovisa Ovafilisti nokutjita kutja ve kambure kutja u ri munda wawo.
Momakawondjero woruveze Ovafilisti va sekama okukarwisa Ovaisrael. Motjirwa hi Saul na Jonatan va zepwa. Ihi tja hihamisa David omutima tjinene, nu eye wa tjanga eimburiro ewa, ma imbura: ‘Ami me hihamwa omutima na ove rumbi randje Jonatan. Ove tjiri wa ri omusuverwa ku ami!’
Kombunda yaimbi David wa yaruka ku Israel kotjihuro tjaHebron. Ingo kwa ri otjirwa pokati kovarumendu mba toorora omuzandu waSaul Isboset okurira ombara novarumendu varwe mbaave vanga David ma rire ombara. Nungwari korusenina ovarumendu vaDavid va taara. David wa ri nozombura 30 indu tja rira ombara. Eye wa honapara oure wozombura hambombari nohinga mu Hebron. Omana watjiva wovazandu ve mba kwaterwa mu Hebron, ooAmnon, na Absalom na Adonija.
Oruveze rwa yenena David novarumendu ve tji va ya okukakambura otjihuro otjiwa tjena Jerusalem. Joab, omuzandu warwe womuṱena waDavid Seruja, wa hongorera po motjirwa. Mena ranao David wa suta Joab mokumuririsa omuhongore wotjira tje tjovita. Nambano David wa uta okuhonapara motjihuro tjaJerusalem.
1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Ekuruhungi 11:1-9.
Mo yenene okutara ku imbi wina
HONGA OVANATJE VOYE
David kari nemuma
Lesa ehungi rOmbeibela ewa ndi, u tjiwe kutja otjikeṋa tji tja vatera David.
