SAULO nĩwatatie ĩngĩ kũkwata Ndaviti. Nĩwoosie asikalĩ ala aseo vyũ 3,000 na athi akamũmanthe Ndaviti. Na yĩla Ndaviti wamanyie ĩũlũ wa ũndũ ũsu, atũma athiani makamanye vala Saulo wambĩte maeema nĩ kana makome ũtukũ. Na ĩndĩ Ndaviti akũlya elĩ ma aũme make: ‘Nũũ katĩ wenyu ũkũendany’a nakwa kambinĩ ya Saulo?’

Nake Avisai asũngĩa, ‘Nyie nĩngũthi naku.’ Avisai aĩ mwana wa Nzeluia, mwĩĩtu-a-inyia wa Ndaviti. Saulo na aũme make makomete, Ndaviti na Avisai nĩmalikile kambinĩ makungĩte. Na moosa ĩtumo ya Saulo yĩla yaĩ vakuvĩ na mũtwe wake na sũva wa kĩw’ũ. Vai mũndũ waamona kana kũmew’a nũndũ onthe nĩmakomete makalĩkwa vyũ.

Kwasisya Ndaviti na Avisai yu. Mo nĩmaumie kambinĩ ĩsu, nayu me vandũ vate mũisyo kĩĩmanĩ ĩũlũ. Ndaviti nĩwaanĩĩsye mũnene wa ita sya Isilaeli ayasya: ‘Avineli, nĩkĩ ũtanasũvĩa mwĩaĩi waku mũsumbĩ? Sisya! Ĩtumo yake na sũva wake wa kĩw’ũ iĩva?

Saulo aamũka nĩwamanyie wasya wa Ndaviti, nake akũlya: ‘Wasya ũũ nĩ waku Ndaviti?’ We nũtonya kwona Saulo na Avineli vaaya ĩtheo?

Nake Ndaviti asũngĩa Saulo, ‘Ĩĩ ninyie, mwĩaĩi wakwa mũsumbĩ.’ Na Ndaviti akũlya: ‘Wĩenda ũngwatĩa kĩ? Nĩkĩte ũthũku mwaũ? Ĩtumo yaku nĩ yĩĩ, we mũsumbĩ. Tũma ũmwe wa aũme maku oke ose.’

Na Saulo asya, ‘Nĩnĩvĩtĩtye, nĩnĩkanganĩtye ta ndia.’ Na ĩndĩ Ndaviti eeĩendea, nake Saulo asyoka mũsyĩ. Ĩndĩ Ndaviti asya ngoonĩ yake: ‘Mũthenya ũmwe Saulo akambũaa. No nginya nĩtolokele nthĩ ya Avilisiti.’ Na ũu nĩw’o weekie. Ndaviti nĩwakengie Avilisiti maĩkĩĩe kana e ngalĩko yoo.

Ĩvinda ĩna ĩtina Avilisiti nĩmaendie kũkita na Aisilaeli. Na kaũnĩ ũsu, Saulo na Yonathani mooawa. Ũndũ ũsu watumie Ndaviti aũũya mũno, nake aandĩka wathi mũseo mũno, waasyaa: ‘Nĩngũũũya kwondũ waku, mwana-a-asa Yonathani. Nĩwambendeeasya mũno!’

Ĩtina wa ũu Ndaviti nĩwasyokie Isilaeli, ndũanĩ ya Eviloni. Na kwaĩ kaũ katĩ wa andũ ala mamũnyuvĩte Isi-vosethi mwana wa Saulo atw’ĩke mũsumbĩ, na ala meendaa Ndaviti atw’ĩke mũsumbĩ. Ĩndĩ ĩtina andũ ma Ndaviti masinda. Ndaviti aĩ na ũkũũ wa myaka 30 yĩla watwiwe mũsumbĩ. Asumbĩkie Eviloni kwa myaka mũonza na nyusu. Amwe ma ana make ala masyaĩwe vau meetawa Aminoni, Avisalomu na Atoniya.

Ĩvinda nĩyavikie yĩla Ndaviti na aũme make mambatie makakwate ndũa nzeo yĩtawa Yelusaleme. Yoavu, mwana ũngĩ wa Nzeluia, mwĩĩtu-a-inyia wa Ndaviti, nĩwatongoesye kaũnĩ. Kwoou Ndaviti amũtuva kwa kũmũtw’a mũnene wa ita syake. Yu ĩndĩ Ndaviti ambĩĩa kũsumbĩka e nthĩnĩ wa ndũa ya Yelusaleme.

1 Samueli 26:1-25; 27:1-7; 31:1-6; 2 Samueli 1:26; 3:1-21; 5:1-10; 1 Mavinda 11:1-9.