LAJ Saul toj traj xkamsinkil laj David, joʼkan naq kixkʼam 3.000 aj puubʼ chi xsikʼbʼal. Naq laj David kixnaw aʼin, kixtaqlahebʼ li winq chi rilbʼal bʼar yook chi hilank laj Saul. Tojaʼ naq laj David kixye rehebʼ wiibʼ li winq: ‹Ani eere txik chiwix bʼarwiʼ yook chi hilank laj Saul?›

Laj Abisai, xyum xZeruya; ranabʼ laj David, kixye: ‹Laaʼin tinxik chaawix›. Laj David ut laj Abisai keʼok bʼarwiʼ yookebʼ chi wark laj Saul ut ebʼ laj puubʼ. Maaʼani kiʼilok rehebʼ chi moko keʼrabʼi ta naq keʼok. Tojaʼ naq laj David kixchap chi xkʼatq xjolom laj Saul, li xjutzʼ chʼiichʼ ut xnaʼaj li xhaʼ laj Saul.

Naq laj David ut laj Abisai keʼelk chaq chi xkʼatq laj Saul kohebʼ saʼ xbʼeen jun li tzuul. Tojaʼ naq laj David kixye re li nakʼaakʼalenk re laj Saul: ‹Abner, kʼaʼut naq inkʼaʼ yookat xkʼaakʼalenkil laj eechal aawe? Ma nakaanaw bʼar wank li xjutzʼ chʼiichʼ ut xnaʼaj li xhaʼ laj Saul?›

Naq kiʼajk ru laj Saul, kirabʼi xyaabʼ xkux laj David. Laj Saul kixye: ‹David, ma laaʼat yookat chi aatinak?› Laj Saul ut laj Abner wankebʼ taqʼa ut yookebʼ rabʼinkil laj David.

Laj David kixye re laj Saul: ‹Laaʼin at awabʼej, kʼaʼut naq taawaj inkamsinkil? Kʼaru xinbʼaanu aawe? Arin wank laajutzʼ chʼiichʼ, chalqebʼ xkʼambʼal›.

Laj Saul kixye re laj David: ‹Maaʼus innaʼlebʼ, moko us ta xinbʼaanu›. Chirix chik aʼan, xko laj David ut laj Saul kisutqʼiik saʼ rochoch. Tojaʼ naq laj David kiʼok xkʼoxlankil: ‹Twulaq xqʼehil naq laj Saul tinxkamsi. Tinxik saʼ xtenamitebʼ laj Filisteo›. Naq laj David kiwulak saʼ xyanqebʼ laj Filisteo kixbʼalaqʼihebʼ, xbʼaan naq kixbʼaanu ribʼ naq tixtenqʼahebʼ.

Chirix chik aʼan ebʼ laj Filisteo xkohebʼ chi yalok rikʼinebʼ laj Israel. Saʼ li yalok aʼin, laj Saul ut laj Jonatan keʼkamk ut laj David kirahoʼk saʼ xchʼool. Joʼkan naq kixtzʼiibʼa jun li bʼich ut kixye: ‹At Jonatan, ra inchʼool aabʼan. Kʼajoʼ naq xatinra!›

Tojaʼ naq laj David kisutqʼiik Israel saʼ li tenamit Hebron. Saʼ li tenamit Hebron wiibʼ chʼuut chi winq yookebʼ chi yalok, xbʼaan naq keʼxsikʼ ru ani t-awabʼejinq rehebʼ. Jun chʼuut kixsikʼ choʼq awabʼej laj Is-boset, ralal laj Saul. Ut li jun chik chʼuut kixsikʼ choʼq awabʼej laj David. Abʼan ebʼ li keʼsikʼok re laj David keʼelk chiʼus saʼ li yalok. Laj David kiʼok chi awabʼejink naq wank 30 chihabʼ re ut chiru 7 chihabʼ rikʼin 6 po kiʼawabʼejink saʼ li tenamit Hebron. Aran kiyoʼlaak laj Amnon, laj Absalon ut laj Adonias, ebʼ li ralal laj David.

Moqon chik, laj David ut ebʼ laj kʼanjel chiru, kohebʼ reechaninkil li tenamit Jerusalen. Ut laj Joab jun chik rehebʼ li xyum xZeruya kikʼamok bʼe saʼ li yalok aʼin. Joʼkan naq laj David kixxaqabʼ laj Joab choʼq aj jolominel saʼ xyanqebʼ laj puubʼ ut laj David kiʼok chi awabʼejink saʼ li tenamit Jerusalen.