SAUL okwa kala ta kendabala natango okukwata David. Efiku limwe, Saul okwa kufa ovakwaita vaye 3 000 ovo va pyokoka molwoodi, ndele ta i navo va ka konge David. Eshi David e shi uda, okwa tuma eendadi oufiku di ka tale kutya Saul novakwaita vaye ova onga onhanda peni. Eshi va mona kutya Saul ova onga onhanda peni, David okwa pula ovakwaita vaye vavali a ti: ‘Olyelye a hala okuya naame konhanda yaSaul?’

Abisai okwe mu nyamukula a ti: ‘Ohatu dulu okuya naave.’ Abisai okwa dalwa komumwainakadona waDavid, wedina Seruja. David okwa ya pamwe naAbisai ndele tave livakele monhanda yaSaul oufiku, fimbo Saul novakwaita vaye va kofa. Ova kufa po eonga laSaul nombao yaye yomeva. Oinima oyo ivali oya li ashike pomutwe waSaul. Kapa li nande oumwe e va uda ile e va mona, molwaashi Saul novakwaita vaye aveshe ova li va kofa eemhofi doshitula.

Tala kuDavid naAbisai mefano olo li li kolumosho. Ngaho ova dja mo nale monhanda yaSaul, nova londa nokuli komhunda. David ota ingida mokule ondjai yetangakwaita laIsrael, ta ti: ‘Abner! Omolwashike ino amena omwene woye, ohamba? Eonga lohamba nombao yaye yomeva oi li peni?’

Opo nee, Saul okwa penduka. Okwa dimbuluka ondaka yaDavid, nokwe mu pula a ti: ‘Ondaka oyoye oyo David?’ Mbela Saul naAbner ou va wete mefano olo li li pedu kolulyo?

David okwa nyamukula Saul a ti: ‘Heeno, omwene wange ohamba.’ Opo nee David okwa pula Saul a ti: ‘Omolwashike to kendabala okukwata nge? Onde ku ninga shike? Ohamba, eonga loye oleli. Tuma omukwaita woye umwe e li ile ko.’

Saul okwa dimina a ti: ‘Onda ninga oshinima sha puka. Inandi katuka pandunge.’ Okudja opo, David okwa ya neendjila daye, ofimbo Saul a shuna keumbo. Ndele David okwa li te lipopile ta ti: ‘Mafiku, Saul ota ka dipaa nge. Ondi na okuya onhapo kedu lOvafilisti.’ Osho osho naanaa a li a ninga. Okwa ka heka Ovafilisti, ndele tava itavele kutya paife David okwaama kombinga yavo.

Konima yefimbo, Ovafilisti ova li va ka lwa nOvaisrael. Saul naJonatan ova li va dipaelwa molwoodi olo. Eshi David a kundana oshinima osho, okwa li a nyika oluhodi neenghono, nomolwaasho okwa ka shanga eimbilo lihokwifa, omo a imba a ti: ‘Onda uda nai omolwoye, omumwatate Jonatan. Ove owa li lela kaume kange kashili.’

Konima yaasho, David okwa li a shuna kuIsrael, koshilando shedina Hebron. Ndele opa li pa tukuluka olwoodi pokati kovakwaita ovo va li va hala omonamati waSaul, Isboset, a ninge ohamba, naavo va li va hala David oye a ninge ohamba. Hauxuuninwa, ovakwaita vaDavid ova ka findana po olwoodi olo. David okwa li e na omido 30 eshi a ninga ohamba. Okwa kala ta pangele muHebron oule womido heyali netata. Omadina ovanamati vaye vamwe ovo va dalelwa muHebron oo: Amnon, Absalom naAdonai.

David okwa li e lilongekida okuya a ka kwate ko oshilando shiwa shedina Jerusalem. Joab oye a li ta wilike etanga lovakwaita. Joab naye okwa dalwa kuSeruja, omumwainakadona waDavid. Konima yefindano olo, David okwa li a ninga Joab ondjai yovakwaita vaye. Okudja opo, David okwa ka kala ta pangele muJerusalem.