SAULIP David tigusariniaqqippaa. Sakkutuumi sorsullaqqissut ilaat 3000-it ilagalugit ujariartorpaa. Tamanna paasileramiuk David alapernaarsuisunik aallartitsivoq Saul innuttaalu sumi unnuami tammaarnersut paasiniaqqullugu. Taava Davidip innuttami ilaat marluk aperai: ’Kia arlassi ilagissavaanga Saulip tammaarfianut?’

’Uanga,’ Abisjaj akivoq. Davidip qatanngutaata arnap Zerujap taanna erneraa. Saul innuttaalu sinitsillugit David Abisjajilu tammaarfimmut malugitinnaveersaarlutik iserput. Saulip naaligaa qummuattaalu imiisivik Saulip niaquata eqqaaniittut tiguaat. Takuneqarnatillu tusarneqanngillat tamarmik sinimmata.

Maanna David Abisjajilu takoriakkit. Aniguipput, annallutillu qattornup qaavaniipput. Davidip Israelikkut sakkutuut naalagaat suaarpaa: ’Abner-iaa! Sooq naalakkat kunngi paarinngiliuk? Takuuk! Naaligaa qummuattaalu naak?’

Saul iterpoq. Davidip nipaa ilisaraa, aperalunilu: ’David, illinuna?’ Saul Abnerilu takanani takusinnaavigit?

’Aap, naalagara kunngi,’ Davidip Saul akivaa. Davidilu aperaaq: ’Sooq tigusariniarpinga? Sumik ajortuliorama? Aajuna naalikkat, kunngi-aa. Innuttavit ilaata aaliuk.’

’Ajortuliorsimavunga,’ Saul nassuerpoq. ’Sianiitsuliorsimavunga.’ Taava David ingerlavoq, Saulilu angerlarpoq. Davidili imminut oqarfigivoq: ’Qaquguluunniit Saulip toqussinnaavaanga. Filisterit nunaannut qimaasariaqarpunga.’ Taamaaliorporlu. Davidip filisterit salloqittarpai taakkuninnga tapersersuilersimalluni.

Kingorna filisterit Israelikkunnut sorsukkiartorput. Akiuunnermi Saul Jonatanilu toqutaapput. Davidip tamanna aliatsaatigeqaa, kusanartumillu taalliorpoq ilaatigut ima oqaasertalimmik: ’Aliasuutigaakkit, qatanngutiga Jonatan. Asaqigakkit!’

Tamanna pereermat David Israelikkut nunaannut uterpoq, illoqarfimmut Hebronimut uterpoq. Saulip erneranik Isjbosjetimik kunnginngortitsiniat Davidimillu kunnginngoqqusisut imminnut sorsuupput. Kiisamili Davidimut illersuisut ajugaapput. David 30-nik ukioqarluni kunnginngorpoq. Ukiut arfineq-aappassaat qiteqqullugu Hebronimi naalakkersuivoq. Tassani najugaqartilluni ernertaarisaasa ilagaat Amnon, Absalom Adoniʹjalu.

Taava Davidip innuttaasalu illoqarfik alianaatsoq Jerusalemimik atilik tigusariartorpaat. Joab, Davidip qatanngutaata arnap Zerujap ernerisa ilaat, akiuunnermi siuttuuvoq. Taava Davidip Joab akilerpaa sakkutuuminut naalaganngortillugu. Maanna David illoqarfimmi Jerusalemimi naalakkersuilerpoq.