SAULO waesekele jikwabo kuba’mba epaye Davida. Wasendele bashilikale banji bakosa 3,000 kuya na kumukeba Davida. Davida byo ayukile kino, watumineko ba kuya na kumona kuba’mba bayuke kwatebelejile Saulo ne bantu banji bobwa bufuku. Kabiji Davida waipwizhe bantu banji babiji amba: ‘Ñanyi pe anweba waswa kuya ne amiwa ku kampu wa kwa Saulo?’

Abishai wakumbwile’mba: ‘Nsakuya nenu.’ Abishai wajinga mwana nyenga ya kwa Davida, aye Zeluya. Kimye Saulo ne bantu banji kyo bajinga mu tulo, Davida ne Abishai bayile mu kampu kishinshitu. Batolele jifumo ja kwa Saulo ne mulondo wanji wa mema, byajinga panshi ku mitwe yanji. Kafwako nangwa umo wibamwene nangwa kwibomvwa ne, mambo bonsetu bajinga mu tulo.

Pano akimona Davida ne Abishai. Bafumineko ne kukemana kwalepa peulu ya mutumba. Davida wabijikile kufuma peulu ku mukulumpe wa nzhita ya bena Isalela amba: ‘Obewa Abina, mambo ka o wabujila kuzhikijila mfumu, nkambo yobe? Akitala! Nga jifumo ne mulondo wanji wa mema biji kwepi?’

Saulo wabukile pa tulo. Wayukile jiwi ja kwa Davida kabiji waipwizhe’mba: ‘Nanchi obewa, yobe Davida nyi?’ Abya wibamona ba Saulo ne Abina panshi po nyi?

Davida wakumbwile kwi Saulo amba: ‘Ee mwane, nkambo yami, mfumu.’ Kabiji Davida wamwipwizhe’mba: ‘Nanchi mambo ka o mubena kukebela kunkwata? Kintu ka kyatama kyo nauba? Talai, jifumo jenu anweba mfumu, aje. Lekai umo wa mu bantu benu eye ejitambule.’

Saulo waambile’mba: ‘Natamisha. Nauba kintu kya bumbulwamaana.’ Ponkapo, Davida wayile ne jishinda janji kabiji Saulo naye wabwelele kwanji. Bino Davida waambile mu muchima wanji amba: ‘Juba jimo Saulo ukangipaya. Nafwainwa kunyemena ku kyalo kya bena Filishitiya.’ Kabiji ne kunyema wanyemene. Davida wabepele bena Filishitiya ne kwibalengela kwitaba amba wajinga ku lubaji lwabo.

Pa kupitapo kimye, bena Filishitiya bayile na kulwa nkondo na bena Isalela. Mu yoya nkondo, ba Saulo ne Yonafwanyi bebepayile. Kino kyalengejile Davida kumvwa bingi bulanda, ne kubwela kunemba lwimbo wawama bingi, mo aimbile’mba: ‘Nji bingi na bulanda na mambo a obewa yaya Yonafwanyi. Wajinga muntu wawama bingi kwi amiwa!’

Panyuma ya kino, Davida wabwelele ku Isalela mu muzhi wa Hebulona. Muno mwaishile kwikala nkondo pakachi ka bantu basajile mwana Saulo, aye Ishibosheta kwikala mfumu ne bantu bakwabo bakebelenga Davida amba ekale mfumu. Bino, ku mpelo bantu ba kwa Davida bashinjile. Davida wajinga na myaka ya kusemwa 30 kimye kyo bamwikezhe pa bufumu. Walamine pa myaka itanu na ibiji ne kichika mu Hebulona. Baana bamo bo asemene kimye kyo akijinga mu Hebulona bajinga ba Aminona, Abisalomo ne Adoniya.

Kimye kyafikile Davida ne bantu banji kyo bayile na kulukuka muzhi wamwekananga bulongo wa Yelusalema. Yoaba, mwana nyenga ya kwa Davida, aye Zeluya, ye watangijilenga mu ino nkondo. Onkao mambo, Davida wamupele kilambu Yoaba kya kwikala mukulumpe wa nzhita yanji. Davida watendekele pano kulama mu muzhi wa Yelusalema.