SAULU wakondanga kaka Davidi. Obakidi 3.000 ma makesa mandi bele avavi Davidi. Vava Davidi kazaya e diambu diadi otumini alangi benda solola fulu kaleka Saulu ye makesa mandi. I bosi, oyuvwidi wole muna ntaudi zandi: “Nani okulumuka yame kuna kwa Saulu kuna ndo?”

O Abisai ovutwidi vo, “omono nkulumuka yaku.” Abisai mwan’a Seruya wa mpangi ankento a Davidi. O Saulu yo makesa mandi balele. O Davidi yo Abisai balueke kuna kalavalela o Saulu. Babongele edionga ye nkalu a maza kuna ntu a Saulu. Ke vena muntu wabamona ko, ngatu sikama kadi awonso tulu twayingi balele.

Tala Davidi yo Abisai ovava. Batinini, batombokele kuna mongo. O Davidi okazidi kuna kwa nkuluntu a makesa ma Isaele vo: ‘E Abene, adieyi kuyingididi mfumu aku wa ntinu ko? Tala akweyi kuna edionga dia ntinu, ye nkalu andi a maza?’

O Saulu osikamene. Otonene nding’a Davidi, ovovele vo: ‘Nga i nding’aku e Davidi?’ Nga omwene Saulu yo Abene ova yanda?

O Davidi ovutwidi Saulu vo: “I nding’ame, e mfumu wa ntinu,” unyuvwidi: ‘Ekuma okunkondelanga? Nkia mbi mpangidi? Tala edionga diaku e ntinu! Yambula etoko keza dio bonga.’

O Saulu ovovele vo, ‘nsumukini, uzowa mpangidi.’ O Davidi wele kwandi, o Saulu ovutukidi kuna nzo andi. Kansi, o Davidi ovovele muna ntim’andi vo: ‘Lumbu kimosi mvondwa kwa Saulu: Yambula yatayila kuna nsi a Afelesetia.’ I una mpe kavanga. O Davidi ovunginikini Afelesetia vo ku sambu diau kena.

Oku kwakwiziwa, Afelesetia bele nwana ye Isaele. O Saulu yo Yonatane bavondelo. O Davidi okendalele kikilu. Osonekene nkunga ambote una kayimbila vo: “Muna ngeye nkendalelele, e mpangi ame Yonatane: Wawete kikilu wakal’oku ngina.”

I bosi, o Davidi ovutukidi kuna Isaele, muna mbanza Keberone. Vakedi vita kw’awana basola Isi-bosete wa mwana Saulu kakala ntinu y’ana basola Davidi. Kansi, makesa ma Davidi basunda. O Davidi kimbuta kia mvu 30 kakala vava kayantika yala se ntinu. Mvu nsambwadi ye ndambu kayala muna Keberone. Ezaka nkumbu za wana kawutila kuna Keberone i zazi: Amenone, Abesalome, ye Adoniya.

Ifwene e ntangwa kwa Davidi ye makesa mandi babaka e mbanz’ambote, Yerusaleme. O Yoabe mwana akaka wa Seruya wa mpangi ankento a Davidi wakala se ntu muna vita. O Davidi unsendele muna kunkitula se mfumu a makesa. Owau, Davidi oyantikidi yala muna Yerusaleme.