Chihande 61

Ndavichi Navamupwisa Mwangana

SAULU mweseka cheka akwate Ndavichi. Hamaswalale jenyi himwasakulaho vambwende 3,000 nakuya nakumutonda. Ndavichi hakwijiva ngocho, hikutuma vandoji nakusondwesa chilombo natulila Saulu navatu jenyi ufuku. Jino Ndavichi mwahula vatu jenyi vavali ngwenyi: ‘Iya mwaya nayami kuchilombo chaSaulu?’

Avishai ngwenyi: ‘Yami.’ Avishai himwana ndumbwaNdavichi wapwevo, Zeluwiya. Shimbu vanasavala vaSaulu navatu jenyi, Ndavichi naAvishai hikulivemba nakwingila muchilombo. Kuya no-o likunga lyaSaulu namulondo wenyi wameya, uli kumitwe yaSaulu. Wauchi navamono chipwe kuvevwa mwomwo vosena vali mutulo chikuma.

Tala vaNdavichi naAvishai jino. Vanalovokamo vavatonyi kaha vali hapili. Ndavichi mwavilika kumukulwane wamaswalale vavaIsalele ngwenyi: ‘Avanele, unahonena ika kumulama mwata wove mwangana? Tala! Likunga lyenyi namulondo wameya vili kulihi?’

Saulu kasumuku. Hakwivwa lizu lyaNdavichi, mwahula ngwenyi: ‘Yove Ndavichi, nyi?’ Wavamono vaSaulu naAvanele mwishi tahi?

Ndavichi mwakumbulula Saulu ngwenyi: ‘Eyo, mwata wami mwangana.’ Ndavichi ngwenyi: ‘Unakusaka kungukwachila ika? Chuma chachipi chika ngunalingi? Ove mwangana, tala likunga lyove lino. Tuma mutu wove umwe ezenga alitambule.’

Saulu mwetava ngwenyi: ‘Ngunavulumuna. Ngunalingi mwakuhulama.’ Ndavichi hikuya, kaha Saulu hikukinduluka kwimbo. Jino Ndavichi ngwenyi: ‘Likumbi limwe Saulu mwakangujiha. Ngwatela kuchinyina kulifuchi lyavaFwilishite.’ Ngocho himwachina. Ndavichi mwavongejeka vaFwilishite nakufwelela ngwavo napu wavo jino.

Kutwala muze vaFwilishite navakatuka nakuzunga navaIsalele. VaSaulu naYonatane hikuvajiha mujita kana. Ndavichi mwalishona nakusoneka jino mwaso wamwaza, ngwenyi: ‘Ove ndumbwami Yonatane, nguli nakulinyenga hali ove. Unapunga wamwaza chikuma kuli ami!’

Ndavichi hikukinduluka jino kuIsalele kunganda yaHevelone. Kuwana kuli jita mukachi kavatu vanasake mwanaSaulu, Ishe-mboshete, apwenga mwangana navaze vanakusaka Ndavichi kupwa mwangana. Oloze, vatu jaNdavichi hinavahonesa vakwavo. Ndavichi ali namyaka 30 hakumuhaka hawangana. Himwayula myaka yitanu nayivali nachimbwa chamwaka muHevelone. Vana vamwe vakusemukila kuze vakivo vaAmanone, Avasalome naAtonyiya.

Lwola lwaNdavichi navatu jenyi lwakuya nakufungulula nganda yamwaza yaYelusalema lunahete. Mwana mukwavo waZeluwiya ndumbwaNdavichi, Yowave, hikutwaminyina jita. Kaha Ndavichi mwamuzundula helu nakumupwisa mwata wamaswalale. Jino Ndavichi himwaputuka kuyula munganda yaYelusalema.

Samwele 1, 26:1-25; 27:1-7; 31:1-6; Samwele 2, 1:26; 3:1-21; 5:1-10; Mijimbu 1, 11:1-9.