MPANJI 61

Davidi Anamwilishi Kwikala Mwanta

SAWULU hakukeña cheñi kumukwata Davidi. Hakusenda amayala 3,000 hadi amashidika indi akuluka yitembi nakuya nakumukeñakeña. Chanachilukiyi Davidi, hakutemesha akwakwendesha kulonda eluki kwakamininiyi Sawulu nawantu jindi nawufuku. Dichi Davidi hakuyihula antu jindi ayedi nindi: ‘Hinyi hadenu wukuya nanami kuchilombu chaSawulu?’

Abishayi hakwakula nindi, ‘Nukuya neyi.’ Abishayi himwana kaZeruwiya, muhela Davidi. Henohu Sawulu niantu jindi anakami, Davidi naAbishayi hiyakwiñila wumweneni muchilombu. Hiyakunona iyoña daSawulu ninsaba yindi yamenji, yakutenteka kumutu waSawulu. Kwosi muntu niwumu wunayimoni hela kuyitiyaku, muloña wejima wawu anakami tulu twatweni.

Ichi talaña aDavidi naAbishayi. Anafumimu nawa adichiwahi hewulu dampidi. Davidi hakumubidika mukulumpi wamashidika awaIsarela nindi: ‘Abineri, muloñadi chiwunabulili kumuhemba nkaaka yeyi, mwanta? Talaña! Iyoña dindi ninsaba yindi yamenji yidi kudihi?’

Sawulu hakuhinduka. Hakudiluka izu daDavidi, hakwihula nindi: ‘Iyeyi Davidi?’ Wunayimoni aSawulu naAbineri mwishina muna?

Davidi hakumwakula Sawulu nindi, ‘Eña nkaaka yami mwanta.’ Dichi Davidi hakumwihula nindi: ‘Muloñadi wunakukeñela neyi wunkwati? Chumanyi chatama chineli? Iyoña deyi idi, Eyi mwanta. Lejaku wumu hadi antu jeyi enzi nakudisenda.’

Sawulu hakwiteja nindi, ‘Navulumuni. Nakoñi mwawusupi.’ Hohenohu Davidi hakudiyila kwindi, Sawulu niyena hakufunta kumukala. Ilaña Davidi hakudihoshesha yomweni nindi: ‘Ifuku dimu Sawulu wukanjaha. Natela kutemukila kwituña dawaFwilistinu.’ Ichi dichaneliyi. Davidi hakuyidimba aFwilistinu nakuyilisha eteji nawu wudi dehi kukabadi kawu.

Mukuhita kwampinji aFwilistinu hiyakuya nakulwisha aIsarela. Wejima wawu aSawulu naJonatani hiyakuyijahila kunjita. Ichi hichikumuneñesha Davidi nankashi, nawa hakusoneka kamina kakawahi, mwembayi nindi: ‘Natiyi chineñi hadi eyi, mana kwami Jonatani. Ochinakukeñelihu!’

Hanyima yanichi Davidi hakufunta muIsarela mumusumba waHeberoni. Hadi njita hakachi kawantu anatondi mwana kaSawulu Ishibosheti kwikala mwanta nawantu amakwawu anakeñi nawu Davidi yekali mwanta. Nkumininaku antu jaDavidi hiyakushinda. Davidi wudi nayaaka 30 yakusemuka hanamwilishiwu kwikala mwanta. Hakuyula muHeberoni hadi yaaka yitanu nayiyedi nichikunku. Anyana amakwawu awamayala avweliyi kuna majinawu diwu Aminoni, Abisalomi niAdoniya.

Mpinji yashikili yakwila Davidi niantu jindi ayi nakulukuka musumba wawuwahi waYerusalema. Yowabi, mwana mukwawu wamuhela Davidi Zeruwiya, hakulombola njita. Dichi Davidi hakumufweta Yowabi kuhitila mukumwinka wukulumpi wamashidika indi. Davidi hakutachika kuyula musumba waYerusalema.

1 Samweli 26:1-25; 27:1-7; 31:1-6; 2 Samweli 1:26; 3:1-21; 5:1-10; 1 Kushindulula 11:1-9.