SAULA chuan Davida man a tum leh a. A sipai tha ber ber 3,000 a hruai a, a zawng ta a. Davidan chu chu a hriatin, Saula leh a mite zan riahna hre turin enthlatute a tir a. Tin Davida chuan a mite pahnih chu: ‘Tu zawk nge Saula riahhmunah ka ruala kal ang? tiin a zawt a.

Abisaian: ‘Kei ka kal ang,’ tiin a chhang a. Abisaia chu Davida farnu Zeruii fapa a ni. Saula leh a mite muthilh hlanin Davida leh Abisaia chu zawi tein riah hmunah an vak lut a. Saula lu sir ding lama Saula fei leh tuithawl an la a. An muthilh ngheh avangin tumahin an hmu lo va, an hre bawk lo va.

Tunah Davida leh Abisaia en teh. An kal chhuak leh tawh a, tlang chhipah him takin an awm ta a. Davidan Israel sipai ruai hotu a zuk au va: ‘Abner, engvanginnge i pu, lalber chu i humhim loh? En teh! Khawiahnge a fei leh a tuithawl kha?’ tiin.

Saula a harh a, Davida aw tih a hria a, ‘Chu chu nangmah em ni, David?’ tiin a zawt a. Sawta Saula leh Abnera saw i hmu em?

‘Ni e, ka lalpa, lalber,’ tiin Davidan Saula a chhang a. ‘Engvanginnge mi man i tum? Eng thil tha lo nge ka tih? Heta hi i fei, Aw lalber. I mite zinga pakhat lo kal sela, rawn la rawh se,’ tiin Davidan a hrilh a.

Saula chuan: ‘Ka lo ti dik lo a ni. Atthlak takin ka lo che a ni,’ a ti a. Chu veleh Davida chu a kalna turah a kal a, Saula a haw ta a. Mahse Davida chuan a rilruin: ‘Eng niah emaw chuan Saulan mi la tihlum ang. Philistia-mite ramah ka tlan teh ang,’ a ti a. A tlan ta a. Davida chuan Philistia-mite chu a tihder theiin, tunah chuan an lamah a tang tih a rintir thei a.

A hnu eng hunah emaw Philistia-mite chu Israel do turin an chho va. lndonaah chuan Saula leh Jonathana tihhlum an ni ve ve a. Chu chuan Davida a tilungngai em em a, hla mawi deuh a phuah a: ‘Nangmah vangin ka lungngai em mai, ka unaupa Jonathan. Ka tan i va duhawm em!’ tiin hla a sa a.

Chumi hnuah chuan Davida chu Israel-ah Hebron khawpuiah a kir a. Lalber ni tura Saula fapa Ishbosheta thlangtute leh lalber ni tura Davida duhtute an indo va. A tawpah Davida mite chuan an hneh a. Lalbera siam a nih lai chuan Davida chu kum 30-a upa a ni. Kum sarih leh a chanve Hebron-ah a lal a. Chuta a fapa neih thenkhat chu Amnona, Absaloma leh Adonija te hi an ni.

Davida leh a miten khawpui mawi tak, Jerusalem an tih la tura an chhoh hun a lo thleng a. Davida farnu Zeruii fapa dang Joaban indonaah hma a hruai a. Tichuan Davida chuan Joaba chu a sipai rual hotua siamin lawmman a pe a. Tichuan Davida chuan Jerusalem khawpuiah ro a rel tan ta a.