TAJBʼILTAQ juntl maj Saúl tuʼn ttzyet David tuʼn. Xi tiʼn 3.000 tsoldad aʼyejo mas tbʼanelqetoq tuʼntzun tjyet David kyuʼn. Tej tok tbʼiʼn David jlu, ex tsamaʼn xjal kilte jatumel otaq chi kubʼ ten Saúl toj qonikʼen aju. Xitzen tqanin kye kabʼe xjal: ‹¿Alkye jun kyeye ma txiʼ wukʼile tzmax jatum taʼ Saúl kyukʼe tsoldad?›

‹Jaku chinxe tukʼila›, chi Abisai. Tal Zeruyá te Abisai aju tanebʼ David. Nwtantoq Saúl kyukʼex tsoldad tej tokx jutzpaj David ex Abisai kyxol. Xitzun kyiʼn David tlans Saúl ex aju t-xar tkubʼel aʼ aju tkubʼteq ttxlaj twiʼ. Mi aʼltoq jun nkaʼyin kyiʼj ex mi aʼlteq jun nbʼin kyiʼj tuʼnjo kykyaqil nchi jtantoq.

Keʼyinkuxa David ex Abisai jaʼlo. Ma che el oq ex ma chi japun twiʼ jun witz. Tzajtzen ẍchʼin David tiʼj nejenel kye tsoldad Saúl: ‹Aye Abner, ¿tiquʼntzun mitiʼ nok t-xqʼuqin tajawe aju ajkawil? Jyonkuya tlans ex aju t-xar tkubʼel aʼ, ¿jaʼ ma chi pona?›

Tej tel twatl Saúl, el tnikʼ tiʼj tqʼajqʼojil twiʼ David ex xi tqanen te: ‹¿Apeya David?› ¿Ntlome, mo ntila Saúl ex Abner ateʼkux kubʼne?

‹Aqine›, chi David. Ax ikx xi tqanin: ‹¿Tiquʼn taja tuʼn ntzyete tuʼne? ¿Alkye mya bʼaʼn o bʼant wuʼne? Lu tlansa lu. Bʼaʼn tuʼn ttzaj jun qʼilte›.

‹Axtok ma kubʼ nbʼinchane mya bʼaʼn›, chi Saúl. ‹Ik ntene ik tzaʼn jun xjal mitiʼ tnabʼil›. Ikʼtzun bʼet David, ax ikx te Saúl aj meltzʼaj tja. Nkubʼtoq t-ximen David jlu: ‹Kpol jun qʼij jatumel chin kbʼel bʼyoʼne tuʼn Saúl. Iltiʼj tuʼn nxi oqe toj kytxʼotxʼ aj Filisteo›. A jlu bʼent tuʼn. E kubʼ tsbʼuʼn David qe aj Filisteo tuʼn t-xi kyximin qa otaq tzʼok te kyukʼe.

Tej tbʼet ambʼil, e jax aj Filisteo qʼojel kyiʼj aj Israel. Kyim Saúl ex Jonatán tuj qʼoj lu. Tzaj nim tbʼis David tuʼn jlu, ex kubʼ ttzʼibʼen jun tbʼanel bʼitz ex xi tbʼitzin kyjalu: ‹Nim nchin bʼisune tiʼja werman Jonatán. ¡Nimxix kʼujlaʼntoqe wuʼne!›

Tej tikʼ jlu, anjtz meltzʼaj David toj kytxʼotxʼ aj Israel, atz kubʼ ten najal tuj tnam Hebrón. Toj tnam lu noktaq jun qʼoj kyxol qejo kyaj tuʼn tok Isbóset, aju tkʼwal Saúl, te ajkawil kyukʼeju kyaj tuʼn tok David te ajkawil. Aʼyex kye t-xjal David e kambʼan. Qʼiʼntaq 30 abʼqʼi tuʼn David tej tok te kawil. Kawin wuq abʼqʼi tukʼe mij (nikʼjan) tuj Hebrón. Atzen junjun tkʼwal David jlu e ul itzʼj toj Hebrón: Amnón, Absalón ex Adonías.

Tbʼettzun ambʼil xiʼ David ex qe tsoldad qʼojel tiʼj jun tbʼanel tnam, aju Jerusalén tbʼi. A Joab, aju juntl tal Zeruyá, kubʼ nej toj qʼoj. Tuʼntzun jlu, xi tqʼoʼn David toklen Joab tuʼn tok te nejenel kye tsoldad. Xitzen tzyet tuʼn tkawin David toj tnam Jerusalén.