SAULU a seteka naua ku kuata Ndaviti. Na hangula masualale va ku pua 3.000 ha kati ka masualale veni kaha va ya na ku tonda Ndaviti. Omo Ndaviti ua tantekeyele evi ua tumine vandondzi linga va ka mone kuli ua ka kosele Saulu na masualale veni. Kaha Ndaviti ua hula vamo vamala vavali ku vantu veni ngueni: ‘Iya a ya nange ku cilombo ca Saulu?’

Avisayi ngueni: ‘Yange’. Avisayi ua puile muana Zeluiya ndumbu ya Ndaviti. Ntsimbu Saulu na vantu veni va na ci kosa, Ndaviti na Avisayi va ka kovelele na ku yomba mu cilombo. Va nonene Njava ya mema na likunga lia Saulu, via kele ku mitue ya Saulu. Kaha na umo uahi ua va muene muomu vose va kele mu tulo.

Tala vuovuno va Ndaviti na Avisayi. Va na tinina helu lia muncinda. Kaha Ndaviti ua tambakanene kuli mukuluntu ua masualale vaIsaleli ngueni: ‘Avenele! vika ka uesi na ku vingila kukuove, Muangana? Likunga lieni na Njava yeni vi li kulihi?’

Omo Saulu ua niangumukile. Ua vuile lizi lia Ndaviti ngeci ua hulile ngueni: ‘Yove Ndaviti, ni?’ Ua mono Saulu na Avenele kuze kuintsi?

Kaha Ndaviti ngueni: ‘Yange vene, muangana. Kaha ua mu hula  ngueni: ‘Vika u tondela ku nji kuata? Vupi vuka nji na lingi? Likunga liove lino, A muangana. Tuma umo ua ku vamala vove linga a li izile’.

Kaha Saulu ua litavela ngueni: ‘Nji na lingi vuhenge, nji na lingi vusiname’. Fume haze Ndaviti ua ile vungendzi vueni, kaha Saulu ua hilukile kuimbo. Vunoni Ndaviti ua handekele mu mutima ueni ngueni: ‘Tangua limo, Saulu amba a ku nji tsiha. Nji na pande ku tinina ku cifuti ca vaFilisteo’. Ngeci ua lingilemo. Ndaviti ua ka likuisile ku lingisa vaFilisteo va kulahele nguavo ikeye a li ku mutamba uavo.

Mu nima ya ntsimbu, vaFilisteo va ile mu ku lua na Isaleli. Saulu na Yonatase va ka tsile ku Ndzita yaco. Eci naua ci na kokela Ndaviti vusiua vua kama, kaha ua sonekele muaso ua cili, ngueni: ‘Nji li na vusiua vua kama omo liove, muanetu Yonatase. Ua nji ile cikuma ku mutima!’

Mu nima yevi Ndaviti ua hilukile ku Isaleli ku mbonge ya Hevelone. Kaha hakele ndzita ha kati ka vaze va hanguile Ise-mbosete muana Saulu ku pua muangana, na vaze va tondele nguavo Ndaviti a pue muangana. Vunoni vantu va Ndaviti vakevo va vulile. Ndaviti ua kele na miaka 30 mu va mu tumbikile ha vuangana. Ua suanene ku Hevelone miaka itanu na ivali na meyu. Ua ka semeneneko vamo vana mazina avo Amenone na Avisalome na Andoniya.

Omo ntsimbu ya hetele linga Ndaviti na vantu veni va ka tambule mbonge ya Yelusalema. Yoave, muana mukuavo ua ndumbu ya Ndaviti, Zeluiya, ua tuamenenene ndzita. Ngeci Ndaviti ua lunguisile Yoave mu ku mu puisa mukuluntu ua masualale veni. Kaha Ndaviti ua putukile ku sika mu mbonge ya Yelusalema.