Tanojnots 61

David mochiuak tekiuaj

SAÚL oksepa kinekia kikitskis David. Kitemoto imiuan 3,000 tein okachi kuali tateuianij. Keman David kimatik nejin, kintitanik seki tapijpianij maj kionitanij kani mokauaskia Saúl nejon youal. Ompa, ome itekitikauan kintajtanij: ‘¿Akoni kineki yas nouan kampa yetok Saúl?’

Abisai kijtoj: ‘Nejua niyas mouan’. Abisai katka ikoneuj Zeruyá, ikniuj David. Keman ajsikej, Saúl uan itateuijkauan kochtoyaj, yejika David uan Abisai ichtakakalakkej kampa yetoyaj. Kiuikakej ilanza Saúl uan iatatayiloni tein yetoya itsontaj. Amo akin kinitak niono akin kinkakik, ta nochin kochtoyaj.

Xikinita axkan David uan Abisai. Cholojkej uan yetokej ikuapan se tepet. David kipantsajtsilij tein kinixyekanaya tateuianij israelitas: ‘Abner, ¿keyej amo tikita moteko tekiuaj? ¡Xikita kani yetok ilanza uan iatatayiloni!’

Saúl ijsak uan kitenixmatik David, yejika kitajtanij: ‘¿Tejua ti David?’ ¿Ueli tikinita Saúl uan Abner ne tani?

David tanankilij: ‘Kemaj, tejuatsin notekiuaj’. Uan David kitajtanij: ‘¿Keyej tikneki tinechkitskis? ¿Toni nikchiujtok tein amo kuali? Nikan yetok molanza notekiuaj. Maj kikuiki aksa’.

Saúl kijtoj: ‘Amo nitamati. Nikchiujtok tein amo kuali’. Ompa David yajki, uan Saúl mokepak ichan. Sayoj ika David moluij: ‘Se tonal Saúl uelis nechmiktis, yejika moneki nicholos kampa nemij filisteos’. Uan yejua nejon kichiuak. David uelik kichiuak maj filisteos moluianij ika kinpaleuiskia.

Keman panok tonalmej, filisteos pankisatoj uan kinekiaj kinteuiskej israelitas. Itech neteuil mikkej Saúl uan Jonatán. Nejin kichiuak maj David moteltayokoltiani, uan kijkuiloj se kualtsin nekuikatil, kampa kijtoj: ‘Moka nimotayokoltia, nokniuj, Jonatán. ¡Semi nimitstasojtaya!’

Satepan, David mokepak kampa nemiaj israelitas itech altepet Hebrón. Ompa kipiayaj se neteuil takamej tein kitaliayaj Is-bóset, ikoneuj Saúl, maj mochiuani tekiuaj, imiuan takamej tein kinekiaj maj David mochiuani tekiuaj. Sayoj ika tatankej itekitikauan David. Yej kipiaya 30 xiujmej keman mochiuak tekiuaj. Chikome xiuit uan tajko tekiuajtik Hebrón. Sekin ikoneuan tein ompa kinpiak David motokaytijkej Amnón, Absalón uan Adonías.

Keman panok tonalmej, David uan itekitikauan moaxkatilijkej kualtsin altepet, Jerusalén. Joab, okse ikoneuj Zeruyá, taixyekanak itech neteuil. Yejika David kitalij maj kinixyekanani tateuianij. Ijkuaka David peuak tekiuajti itech altepet Jerusalén.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Crónicas 11:1-9.