Historia 61

David peua tekiuajti

SAÚL kitejtemoua kenon oksejpa kajsis David. Kintlapejpenia yeyi mil soldados niman aman yauj kontejtemoua. Ijkuak David kimati yejuin, kintitlani sekimej ixtakatlachixkej makitatij kanon onokauj Saúl yejon yeuajli. Kuakon, David kintlajtoltia omemej soldados: ‘¿Akinon nouan yas kampa nemi Saúl?’

Abisai kijtoua: ‘Nejua nias’. Abisai ikoneuj se siuatl itoka Zeruyá, akin ikniuj David. Ijkuak Saúl niman isoldados kochij, David iuan Abisai kalakij kampa nokauaj soldados. Kikuiliaj ilanza niman iatekon Saúl, tlen onkatka ikuatitlan. Xakaj kinkaki nion kimita pampa nochimej kochtokej.

Aman xkita David niman Abisai. Yocholojkej, niman nemij ipan se tepetl. David kitsajtsilia akin kiyekana soldados israelitas: ‘Abner, ¿tleka xtiktlajpixtika tekiuaj, akin moteko? ¡Xkita! ¿Kanon onka ilanza niman iatekon?’

Saúl nokuiteua. Okitenkak David niman kitlajtoltia: ‘¿Tejua tiDavid?’ ¿Ueli tikita Saúl iuan Abner ne tlatsintlan?

‘Kema notekiuaj’, tlanankilia David. Niman David kitlajtoltia: ‘¿Tleka tikneki tinechasis? ¿Tlenon xkuajli yonikchiuj? Nikan onka molanza, oh tekiuaj. Xkuajtitlani se mosoldado makikuiki’.

‘Xkuajli tlen yonikchiuj’, kijtoua Saúl. ‘Xnikpiya notlamachilis itech tlen yonikchiuj.’ Kuakon David yauj, niman Saúl nokuepa ichan. San ika, David kijtoua: ‘Xok uejkauis Saúl nechmiktis. Kipiya ika nicholos nias ipan inpaís filisteos’. Niman ijkon kichiua, David kinkajkayaua filisteos kentla kinpaleuiya.

Sakin filisteos kimixnamikij israelitas. Ipan yejon guerra, Saúl niman Jonatán mikij. Yejon kichiua melak manoyolkoko David, niman kijkuiloua se kualtsin tlakuikajli, kampa kijtoua: ‘Melak ninoyolkokoua mopampa, nokniuj Jonatán. ¡Melak nimitstlasojtlaya!’

Ijkuak panoua yejuin, David oksejpa yauj Israel, itech ueyikalpan tlen onka Hebrón. Ompa noixnamiktokej tlakamej akin kitlapejpeniaj matekiuajti Is-bóset, ikoneuj Saúl, iuan oksekimej tlakamej akin kinekij makitlalikan David kentla tekiuaj. Tlakamej akin kipaleuiyaj David tetlanij. David kipiya 30 xiuitl ijkuak kitlaliaj kentla tekiuaj. Chikuasen xiuitl uan tlajko, tekiuajti itech Hebrón. Sekimej ikoneuan David akin ompa tlakatij intoka Amnón, Absalón niman Adonías.

Sakin, David iuan tlakamej akin kipaleuiyaj yauej niman notlatkitiaj Jerusalén se kualtsin ueyikalpan. Joab, okse ikoneuj Zeruyá, ikniuj David, kiyekana yejuin guerra. Ika yejon, David kikauilia makinyekana soldados. Aman David peua tekiuajti ipan ueyikalpan Jerusalén.

1 Samuel 26:1-25; 27:1-7; 31:1-6;2 Samuel 1:26; 3:1-21; 5:1-10;1 Crónicas 11:1-9.