SAULO o ile a leka go swara Dafida gape. A tšea madira a gagwe a matla a 3 000 gomme ba yo tsoma Dafida. Ge Dafida a ekwa ka se, a romela dihlodi gore di yo bona moo Saulo le banna ba gagwe ba bego ba hlomile mešaša bošegong bjoo. Ke moka Dafida a botšiša ba babedi ba banna ba gagwe a re: ‘Ke mang mo go lena yo a tlago go ya le nna mošašeng wa Saulo?’

Abishai a re: ‘Ke tla ya le wena.’ Abishai e be e le morwa wa Tseruya kgaetšedi ya Dafida. Ge Saulo le banna ba gagwe ba sa robetše, Dafida le Abishai ba tsena ka mošašeng ba nanya. Ba tšea lerumo la Saulo le kgapana ya gagwe ya meetse yeo e bego e le kgauswi le hlogo ya gagwe. Ga go le o tee wa madira ao yo a ba bonego goba go ba kwa ka gobane ka moka ba be ba robetše boroko bjo bogolo.

Bjale bona Dafida le Abishai mo seswantšhong. Ba tlogile kua mošašeng gomme ba šireletšegile godimo ga thaba. Dafida o ile a goeletša molaodi wa madira a Isiraele a re: ‘Abenere, ke ka baka la’ng o se wa šireletša kgoši mong wa gago? Lerumo la gagwe le kgapana ya gagwe ya meetse di kae?’

Saulo a tsoga. A tseba lentšu la Dafida gomme a botšiša a re: ‘Na ke wena Dafida?’ Na o bona Saulo le Abenere seswantšhong seo se lego ka letsogong le letona?

Dafida a araba Saulo a re: ‘Ee, kgoši mong wa ka.’ Dafida a mmotšiša a re: ‘Go re’ng o leka go ntshwara? Ke sentše’ng? Wena kgoši, lerumo la gago še le. Roma yo mongwe wa banna ba gago a tlo le tšea.’

Saulo a re: ‘Ke dirile sebe. Ke dirile ka bošilo.’ Dafida a sepela gomme Saulo yena a boela gae. Eupša Dafida a ipotša a re: ‘Ka letšatši le lengwe Saulo o tlo mpolaya. Ke swanetše go tšhabela nageng ya Bafilisita.’ Ka gona o ile a dira sona seo. Dafida a kgona go hlalefetša Bafilisita gomme a ba dira gore ba dumele gore mo nakong ye o ka lehlakoreng la bona.

Ka morago ga nako e itšego, Bafilisita ba ile ba rotoga ba yo lwa le Baisiraele. Saulo le Jonathane ba bolawa ntweng yeo. Se se ile sa nyamiša Dafida kudu gomme a ngwala koša e botse yeo go yona a opetšego ka gore: ‘Ke nyamile kudu ka baka la gago wena ngwanešo Jonathane. Ruri ke be ke go rata kudu!’

Ka morago ga se, Dafida a boela Isiraele motseng wa Heburone. Gwa ba le ntwa magareng ga batho bao ba bego ba kgethile Ishi-boshethe morwa wa Saulo gore e be kgoši le bao ba bego ba nyaka gore Dafida e be kgoši. Eupša mafelelong batho ba Dafida ba ile ba fenya. Dafida o be a na le nywaga e 30 ge a be a dirwa kgoši. O bušitše Heburone ka nywaga e šupago le seripa. Ba bangwe ba barwa ba gagwe bao a ba belegetšwego moo e be e le Aminone, Abesalomo le Adonija.

Go ile gwa fihla nako yeo ka yona Dafida le banna ba gagwe ba ilego ba yo thopa motse o mobotse wa Jerusalema. Joaba e lego yo mongwe wa barwa ba Tseruya kgaetšedi ya Dafida, a ba eta pele ntweng. Ka gona Dafida o ile a putsa Joaba ka go mo dira molaodi wa madira a gagwe. Bjale Dafida a thoma go buša motseng wa Jerusalema.

1 Samuele 26:1-25; 27:1-7; 31:1-6; 2 Samuele 1:26; 3:1-21; 5:1-10; 1 Dikoronika 11:1-9.