SAULU ankho ukahi noku-​ovola vali okukuata David. Wapongiya omafualali 3.000 okuapama vali, aende okukaovola David. Etyi David etyiiva, watuma ovanthu vakalave apa Saulu novalume vae mavakalela. Konyima yotyo, David apulu ovalume vae vevali okuti: ‘Olie maende naame pokapamendu ka Saulu?’

Abisai ati: ‘Ame.’ Abisai ankho omona wa Zeruia omphange ya David. Puetyi Saulu no valume vae ankho velele, David na Abisai aveliyombeleka mokapamendu kavo. Iya avapolopo eonga lia Saulu no katenda kae komeva, ankho vikahi komitwe via Saulu. Nawike wevemona ni okuveiva, mokonda ankho aveho velele.

Pahe tala David na Abisai. Vahupa avalondo komphunda. David pahe ukahi nokuihana onkhalamutue yomafualali ova Isilayeli ukahi pombuelo, okuti: ‘Ove Abener, omokonda yatyi wahayungilile ohamba? Pahe tala! Eonga liae no katenda kae komaande vilipi?’

Saulu apahukapo, aimbuka ondaka ya David, iya apulu okuti: ‘Ove David?’ Saulu na Abener uveete pombuelo apa?

David akumbulula Saulu ati: ‘Enga, ame yatyo. Iya David apulu okuti: ‘Omokonda yatyi uhandela okundyipaa? Otyityi otyivi nekulinga Hamba? Eonga liove olieli. Tuma omulume umwe eye elipole.’

Saulu ati: ‘Ame nalinga otyipuka otyivi. Nalinga o wova.’ Ngotyo David waya nondyila yae, iya Saulu akondoka keumbo. Mahi, David wasoka okuti: ‘Onthiki imue Saulu mandyipaa. Mandyitilila kotyilongo tyova Filisteu.’ Iya ngatyo alinga. David akembelapo ova Filisteu okuti ankho pahe waama konthele yavo. Iya ova Filisteu avetavela.

Onthiki imue, ova Filisteu vaya okukaluisa ova Isilayeli. Saulu na Jonatã avaipawa movita ovio. Otyo tyanumanesa unene David, iya ahoneka otyiimbo tyimue otyiwa ati: ‘Nanumana unene mokonda yove, mukuatate wange Jonatã. Ankho ndyikuhole unene.’

Konyima yotyo, David akondoka ko Isilayeli, kepundaumbo lio Hebron. Ko Hebron ankho kuna ovilwa, pokati kovalume vana ankho vaholovona Isbosete omona wa Saulu, opo akale ohamba. Navana ankho vahanda David alinge ohamba. Mahi, konyima ovalume va David avafindi. David ankho una omanima 30, puetyi alinga ohamba. Atumina mo Hebron omanima epanduvali no meya. Iya atyitilamo ovana ankho vatiwa o Amnon, na Abesalau na Adonia.

Etyi omuvo wehikapo, David novalume vae avaende okuka-​lwisa epundaumbo limue eewa litiwa o Jelusalei, avelitambula. Joabe, omona omukuavo wa Zeruia omphange ya David, ankho oe ukahi komutue wovita ovio. Moluotyo, David emulingi onkhalamutue yomasualali ae. Iya David pahe ahimbika okutumina mo Jelusalei.