SƆƆLO bɔle mɔdenle bieko kɛ ɔkye Devidi. Ɔvale ye ɛlɔnema mɔɔ ze konle nye zo kpalɛ la 3,000 na bɛhɔle kɛ bɛkakpondɛ Devidi. Mekɛ mɔɔ Devidi dele ɛhye la, ɔzoanle ye menli ne bie kɛ bɛhɔli busia na bɛnlea ɛleka mɔɔ Sɔɔlo zokoɛle nɔe ne la. Akee Devidi bizale ye menli ne nwiɔ kɛ: ‘Bɛ nuhua boni a nee me kɛhɔ Sɔɔlo azokoɛleɛ ne a?’

Abehyae buale kɛ: ‘Medame a me nee wɔ kɔ a.’ Devidi adiema raalɛ Zɛluaya ara a le Abehyae. Mekɛ mɔɔ Sɔɔlo nee ye ɛlɔnema ne ɛlafe la, Devidi nee Abehyae yɛle bɛtɛɛ hɔle azokoɛleɛ ne. Bɛvale Sɔɔlo atwɛ ne nee ye dwora ne mɔɔ gyi Sɔɔlo ati sɔlɔ ɛkɛ ne la. Awie biala annwu bɛ anzɛɛ ande bɛ nganeɛ ɔluakɛ ɛnee bɛlafe bubotoo.

Nea Devidi nee Abehyae. Bɛnriandi bɛhɔ boka ne azo mɔɔ awie biala anyɛ bɛ ɛhwee a. Devidi deanle nu zele Yizilayɛma sogya kpanyinli ne kɛ: ‘Abenɛɛ, duzu ati a wɔangola wɔanzinza wɔ belemgbunli ne a? Nea! Belemgbunli atwɛ ne nee ye dwora ne wɔ nienwu?’

Sɔɔlo dunwuele. Ɔdele Devidi ane na ɔbizale kɛ: ‘Devidi, ɛdawɔ ɛ?’ Ɛnwu Sɔɔlo nee Abenɛɛ wɔ ɔ bo ɛkɛ ne ɔ?

Devidi buale Sɔɔlo kɛ: ‘Ɛhɛe, me awulae belemgbunli.’ Na Devidi bizale ye kɛ: ‘Duzu ati a ɛtɛfoa me kɛ ɛkye me a? Duzu munzule a mebɔ a? Nana, wɔ atwɛ ne ɛne. Maa wɔ menli ne mɔ ko ɛralie.’

Sɔɔlo zele kɛ: ‘Meyɛ ɛtane. Meyɛ koasea.’ Yemɔti Devidi hɔle ye ɛleka bie, na Sɔɔlo noko ziale hɔle sua nu. Devidi hanle ye ɔ ti anu kɛ: ‘Kɛ ɔkɛyɛ biala la, kenle ko Sɔɔlo asa baha me yeahu me. Ɔwɔ kɛ menriandi mekɔ Filisitiama maanle nu.’ Yemɔti mɔɔ ɔyɛle la ɛne. Devidi bɛlɛbɛlale Filisitiama ne manle bɛliele bɛlile kɛ akee ɔwɔ bɛ afoa.

Nzinlii Filisitiama hɔle kɛ bɛ nee Yizilayɛma kaho. Wɔ konle ne anu, bɛhunle Dwɔnatan nee Sɔɔlo. Ɛhye manle Devidi lile alɔbɔlɛ kpole, na ɔhɛlɛle nwolɛ edwɛne fɛlɛko bie, mɔɔ se: ‘Mesu wɔ, me diema Dwɔnatan. Ɛsonle bolɛ ɛmaa me somaa!’

Ɛhye anzi Devidi ziale hɔle suakpole Hibulɔn mɔɔ wɔ Yizilayɛ la azo. Konle zile menli mɔɔ kpale Sɔɔlo ara Yehyebɔhyɛte kɛ belemgbunli nee menli mɔɔ ɛnee kulo kɛ Devidi yɛ belemgbunli la avinli. Awieleɛ kolaa ne Devidi menli ne mɔ lile konim. Bɛziele Devidi belemgbunli la ɛnee yeli ɛvolɛ 30. Ɔlile belemgbunli wɔ Hibulɔn ɛvolɛ nsuu ne foa. Mralɛ mrenya mɔɔ ɔwole bɛ wɔ ɛkɛ ne la bie mɔ a le Amenɔn, Abesalɛm yɛɛ Adonaegya.

Mekɛ bie anu Devidi nee ye ɛlɔnema ne mɔ hɔhovale suakpole kɛnlɛma bie mɔɔ bɛfɛlɛ ye Gyɛlusalɛm la. Dwowabe mɔɔ le Devidi adiema raalɛ Zɛluaya ara la, yɛɛ lile konle ɛhye anyunlu a. Ɛhye ati Devidi kpogyale ye zo na ɔyɛle ye safohyenle wɔ ye ɛlɔnema ne mɔ anwo zo. Akee Devidi bɔle ɔ bo kɛ ɔdi belemgbunli wɔ suakpole Gyɛlusalɛm azo.