SAÚL xraj chik jumul xuchap David. Xukʼam bʼi 3.000 ajchʼoj che kʼo kichoqʼabʼ rech kketzukuj David. Chiʼ David xuta wariʼ, xeʼutaq bʼi achijabʼ rech kkila chike lugar xkanaj wi Saúl che wajun aqʼabʼ. Tekʼuriʼ xuta wariʼ che kebʼ ajchʼoj: ‹Kinwilaʼ na ri Saúl ¿Jachin kraj kbʼe wukʼ?

‹In kinbʼek›, xchaʼ Abisai. Abisai are ukʼojol Zeruyá, ranabʼ David. Chiʼ Saúl xuqujeʼ ri täq ajchʼoj tijan kewarik, David rukʼ Abisai xeʼok bʼi pa ri lugar. Xkekʼam bʼi ri nim raqan uchʼichʼ rukʼ ri uxaro (xaruʼ) rech jaʼ rech ri Saúl che kʼo naqaj che ri ujolom. Nijun xrilo xuqujeʼ nijun xuto rumal che e warnaq konojel.

Chawilampeʼ ri David rukʼ Abisai. Xeʼanmajik, e kʼo puwiʼ jun juyubʼ (jïbʼ). David xubʼij wariʼ che ri ajkʼamal bʼe chike ri ajchʼoj rech Israel: ‹Abner, ¿suche tijan ta kachajij ri ajawinel? ¡Chawilampeʼ! ¿Jachiʼ e kʼo wi ri nim raqan uchʼichʼ rukʼ ri xaro rech ujaʼ?› Xchaʼ.

Xwaʼlaj ri Saúl. Xuta ri uchʼabʼal David, are kʼu xubʼij wariʼ che: ‹¿La at ri David?› Chawilampeʼ ri Saúl rukʼ Abner e kʼo ikim che ri wachbʼäl.

‹Jeriʼ ajawinel›, xchaʼ David. Tekʼuriʼ David xuta che: ‹¿Suche kawaj kinakamsaj? ¿Su itzelal nubʼanom chawe? Kʼo waral ri achʼichʼ, ajawinel. Chpet jun ajchʼoj che utzukuxik›.

‹Nubʼanom itzelal›, xchaʼ Saúl. ‹Xa kʼot nunoʼj›, xchaʼ. Tekʼuriʼ David xbʼek, Saúl xtzalij pa rachoch. David xubʼij che ribʼ: ‹Jun che wa täq qʼij Saúl kinukamsaj na. Rajawaxik kinanmaj bʼik, kinbʼe pa kitinamit filisteos›, xchaʼ. Are kʼu waʼ xubʼano. David xkunik xubʼan chike ri filisteos che kkekojo che keʼutoʼ kimik.

Xqʼax kebʼ oxibʼ junabʼ tekʼuriʼ ri filisteos xechʼojin kukʼ ri Israel. Pa ri chʼoj, xekam ri Saúl rukʼ Jonatán. Wariʼ xubʼano che ri David sibʼalaj xbʼisonik, rukʼ wariʼ xutzʼibʼaj jun jeʼlikalaj bʼixonem, xubʼij wariʼ: ‹Sibʼalaj kinbʼison chawe, wachalal, Jonatán. ¡Sibʼalaj xatinwaj!›

Kʼisbʼal re David xtzalij Israel, ri tinamit rech Hebrón. Chilaʼ kʼo jun chʼoj che kixoʼl ri achijabʼ che kkechaʼ ri Is-bóset, ri ukʼojol Saúl, rech kubʼan ajawinel, tekʼuriʼ ri nikʼaj chik kkaj che are David kubʼan ajawinel. Kʼisbʼal re xechʼakan ri achijabʼ re David. David kʼo 30 ujunabʼ chiʼ xubʼan ajawinel. Xubʼan ajawinel wuqubʼ junabʼ rukʼ nikʼaj pa Hebrón. Chilaʼ David xekʼejeʼ rajkʼwal jujun chike are Amnón, Absalón xuqujeʼ Adonías.

Xqʼax kebʼ oxibʼ junabʼ David rukʼ täq rajchʼoj xebʼe che ubʼanik chʼoj rukʼ jun jeʼlikalaj tinamit ubʼiʼ Jerusalén. Joab, jun chik ral Zeruyá, ri ranabʼ David, xubʼan ajkʼamal bʼe rech wajun chʼoj. Wariʼ sibʼalaj utz xril David rumal laʼ xubʼan ajkʼamal bʼe che, pa kiwiʼ ri täq ajchʼoj. Rumal waʼ David xumaj ubʼanik ajawinel puwiʼ Jerusalén.