YAPATAWANMI Saulqa Davidta hapiruyta munan. Chaymi 3.000 soldadonkunawan maskaq rirqa. Davidqa chayta yacharuspanmi, wateqaqkunata kacharqa qawamunankupaq maypitaq Saulqa chay tuta samasqanta yachananpaq. Hinaspanmi, iskaynin runankunata tapurqa: ‘¿Pitaq riraysiwanman Saulpa campamentonkama?’ nispa.

Hinaptinmi Davidpa panin Sarviapa qari wawan Abisai sutiyoq runa nirqa: ‘¡Haku ñoqawanyá!’ nispa. Campamentonkupi Saul hinaspa runankunapas puñunankukama Davidqa Abisaipiwan campamentoman yaykururqaku. Hinaspanmi Saulpa sawnanmanta aparikurqaku lanzantawan yakuyoq aysakullata. Manam pipas rikurqachu nitaq musyarqachu llapallanku puñukurusqankurayku.

Dibujopi qaway, Davidwan Abisaiqa pasakuspankum huk moqopa puntanpi kachkanku. Israel nacionpa tropankunapa jefentam Davidqa qayaspa nirqa: ‘Abner, ¿imanasqamá manaqa allintachu waqaycharqanki servisqayki reytaqa? Kunanyá ¡maskay! ¿Maypitaq kachkan lanzanpiwan yakuyoq aysakun?’, nispa.

Saulqa rikchariruspanmi Davidpa vozninta reqsiruspan nirqa: ‘¡Qamqariki kachkasqanki Davidmi!’ nispa. ¿Qawachkankichu uray kaq dibujopi Saultawan Abnerta?

Hinaptinmi Davidñataq nirqa: ‘Arí, reynilláy ñoqaqa kani Davidmi. ¿Imanasqamá kay serviqnikitaqa qatikachawanki? ¿Ima mana allintamá ñoqaqa rurarurqani? ¡Reynilláy, kayqaya lanzaykiqa kaypi kachkan! Sirvientekitayá kachamuy kay lanzata hoqarinanpaq’ nispa.

Hinaptinmi Saul nirqa: ‘Ñoqaqa reqsikunim huchallikurusqayta. ¡Loco hinam kaykunata ruraruni!’ nispa. Hinaptinmi Davidqa pasakurqa hinaspa Saulñataq wasinman kutikurqa. Davidmi ichaqa piensarurqa: ‘Saulqa huk kaqnin punchawpim wañurachiwanqa lluptispayá ayqekusaq Filistea runakunapa nacionninman’ nispa. Chaynata ruraspanmi Filistea runakunata Davidqa creerachirqa llaqtamasinkunata cheqnisqanta.

Chay punchawkunapim Filistea runakuna Israel casta runakunapa contranpi peleanankupaq rirqaku. Chaypim Saul chaynataq Jonatanpas wañurqaku. Chaymanta yacharuspanmi Davidqa sinchita llakikururqa, hinaspa sumaq aya takichatam qellqarqa kayna niqta: ‘Jonatan wawqelláy, llumpaytam qamqa llakirachiwanki. ¡Maynataraqmi kuyarqayki!’ nispa.

Chaymantam Davidqa kutirqa Israel nacionman hinaspa Hebron llaqtaman rirqa. Chay llaqtapim Saulpa churin Is-boset rey kananpaq akllaq runakunawan, rey kananpaq David munaqkunawan pelearqaku. Hinaspanmi Davidpa runankuna vencerqaku. Davidqa kamachiyta qallarispa 30 watanpi karqa. Hinaspam qanchis wata parten Hebron llaqtapi kamachirqa. Chay llaqtapim Davidpa churinkuna Amnon, Absalon hinaspa Adonias nacerqaku.

Tiempopa pasasqanman hinam Davidqa soldadonkunawan Jerusalen sutiyoq sumaq llaqtata dueñochakurqaku. Hinaptinmi Davidpa panin Sarviapa qari wawan Joabmi guerrapi peleaptinku vencenankupaq yanaparqa. Hinaptinmi Davidqa churarqa Israelpa tropanpa jefen kananpaq. Hinaspanmi Davidqa Jerusalen llaqtamantaña kamachirqa.