SAÚL nagíiʼ rí magujtuwiin mbu̱júu̱ David. Na̱jkha̱ kagu̱u̱n mbá 3,000 soldados bi̱ itháan míjínʼ mu mbuyáaʼ. Índo̱ David naʼdxun rígi̱, mbruʼun rúʼko̱ nakunguinʼ xa̱bu̱ mu muyama náa minaʼ niguanúu niʼgu Saúl. Ikhú naraxu̱u̱n nájmi̱i̱n xa̱bi̱i̱: ‹Tsáa gáʼga̱ ga̱jma̱á ni̱ndxu̱ʼ náa campamento ndrígóo Saúl rá.›

Ikhú Abisai eʼthí: ‹Maʼgá ikhúúnʼ›. Abisai bugi̱ ñajunʼ aʼdióo Seruya ndxájuu David. Nákha Saúl gajmíi̱n xa̱bi̱i̱ kuwa runuʼ, David ga̱jma̱a̱ Abisai nitu̱ʼu̱u̱n mañúú náa campamento. Nagún ku̱ñu̱u̱n kúdú ndrígóo Saúl ga̱jma̱a̱ rayaʼ rí kajni̱ʼ iyaʼ rí wíji̱ náa níjniúu edxu̱u̱. Nimbáa tseʼñun asndu na̱nguá ma edxuun numuu rí xúgínʼ kuwa runuʼ.

Rí xúgi̱ atayáá David ga̱jma̱a̱ Abisai. Ninikáwimijna, ga̱jma̱a̱ kuwa náa inuu kúbá. David nandxa̱ʼwá náa xa̱bu̱ bi̱ kayá edxu̱u̱ náa soldados ndrígóo Israel: ‹Abner, náa numuu rí na̱nguá xtaa ratiewa̱a̱n rey ndrígáʼ rá. ¡Atayáá! Náa lá rígá kúdú ndrígóo ga̱jma̱a̱ rayaʼ rí kajnu̱ʼ iyaʼ rá.›

Saúl naʼni̱i̱ iduu. Naninuʼ aʼwóo ndrígóo David, ga̱jma̱a̱ naraxi̱: ‹Ikháánʼ ni̱ndxa̱ʼ David ráʼ.› Lá nandoo natayáá Saúl ga̱jma̱a̱ Abner rí wájun asndu kawáá ráʼ.

Ikhú David eriʼña: ‹Xúʼko̱ tátá rey›. Ga̱jma̱a̱ David naraxi̱: ‹Náa numuu rí nandaʼ gatartuún rá. Ndiéjunʼ dí raʼkhí ni̱ni̱ rá. Gi̱i̱ rígá kúdú ndrígáʼ, tátá rey. Atatsíñaʼ rí mbáa xa̱bia̱ʼ ma̱ʼkha̱ ga yáaʼ›.

Saúl eʼthí: ‹Ni̱ni̱ dí ra̱májánʼ. Ninindxu̱ʼ mbáa xa̱bu̱ skágunʼ›. Ikhú David na̱jkha̱a̱, ga̱jma̱a̱ Saúl natanga̱a̱ náa goʼwóo. Mú David nandxa̱ʼwáminaʼ: ‹Asndu náa má mbi̱ʼi̱i̱ gáxíñu̱u̱n Saúl. Gíʼmaa rí magayúuʼ maʼgá náa xuajin ndrígu̱ún filisteos›. Ikhaa rúʼko̱ rí eʼni. David nandoo naʼninduwiinʼ xa̱bu̱ filisteos ga̱jma̱a̱ naʼni rí asndu xóo nambáxu̱u̱ gajmíi̱n.

Nguátha mbiʼi nda̱wa̱á filisteos natsimún guxnamijná gajmiún xa̱bu̱ Israel. Saúl ga̱jma̱a̱ Jonatán nakháñun náa kuwa ruxnamijná. Rígi̱ naʼni rí David maxtáa gíná wéñuʼ, ga̱jma̱a̱ naʼnirámáʼ mbá ajmúú mitsaan, náa rí ikhaa naʼni ajmúú: ‹Ndxájuʼ Jonatán, xtáá gíná wéñuʼ ga̱jma̱a̱ numaʼ. ¡Ra̱ʼkhá tháán nindoʼ ka̱ya̱ʼ!›.

Nda̱wa̱á rí nirígá rígi̱ David natanga̱a̱ náa Israel, xuajin ndrígóo Hebrón. Ikhí narígá mbá xkujndu náa tikhun xa̱bekha bi̱ nandún rí Isbóset, a̱ʼdióo Saúl, mani̱ndxu̱u̱ rey xúʼko̱ má eʼwíínʼ xa̱bekha nandún rí David mani̱ndxu̱u̱ rey. Mú nda̱wa̱á kayuʼ xa̱bi̱i̱ David naʼngu̱u̱n nuxnamijná. David gíʼdoo 30 tsiguʼ índo̱ na̱jkha̱nú nanindxu̱u̱ rey. Mbá juwan tsiguʼ tikhu eʼtáñajunʼ náa xuajin Hebrón. Tikhun e̱ji̱i̱n David bi̱ nagumiin ikhí ni̱ndxu̱ún Amnón, Absalón ga̱jma̱a̱ Adonías.

Nda̱wa̱á David gajmíi̱n xa̱bi̱i̱ nagún gúxnamijná gajmiún xa̱bu̱ bi̱ kuwa náa xuajin mitsaan Jerusalén ga̱jma̱a̱ ikhiin naʼngu̱u̱n. Ndxájuu David bi ñajunʼ Seruya gíʼdaa imba̱a̱ a̱ʼdióo bi̱ nagumbiʼyuu Joab, Joab bugi̱ bi̱ naxnún ikha xa̱bu̱ náa nuxnamijná. Ikha jngó David naʼni rí mayéʼga edxu̱u̱ náa soldados. Rí xúgi̱ David nagíʼdu̱u̱ naʼtañajunʼ náa xuajin ndrígóo Jerusalén.