Makani 61: Davida Waba Mwami
SAULU alimwi uciyanda kujaya Davida. Wabweza basikalumamba mbasyoma bali 3,000, kumane waunka kwaakumulangaula. Davida naamvwa makani aaya, watuma basikutwela kuti bakabone Saulu abantu bakwe nkobakabungana masiku aayo. Kumane Davida wabuzya bantu bakwe bobilo wati: ‘Ngwani ngotulaaunke limwi kuli Saulu?’
Abisyayi wavwiila wati: ‘Ndime.’ Abisyayi mwana wa Zeluya mucizyi wa Davida. Saulu abantu bakwe kaboona, Davida a Abisyayi cakusobelela banjila mucivwuka. Kalede Saulu babweza sumo ankapu yameenda zili kumitwe. Taku naba omwe wababona nikuba kubamvwa nkaambo boonse bakali muŋonzi kapati.
Langa lino Davida a Abisyayi. Bazwa baakwiimina atala lyacilundu kakunyina acabacitikila. Davida woongolola kumupati wabasikalumamba wabana Isilayeli wati: ‘Abina, nkaambo nzi ncotacingilili mwami wako? Langa! Ino lili kuli sumo lyakwe ankapu yakwe yameenda?’
Saulu wabuka. Walizyiba jwi lya Davida kumane wabuzya kuti: ‘Hena nduwe Davida?’ Hena uli mubwenyi Saulu a Abina anselelo aawa?
Davida wamuvwiila Saulu wati: ‘Inzya mwami simalelo wangu.’ Kumane Davida wabuzya: ‘Ino nkaambo nzi ncoyanda kundijaya? Ino ncibi nzi ncindakakucita? Ndeeli sumo lyako, Omwami. Tuma umwi wabantu bako aboole alibweze.’
Saulu walilekelela, wati: ‘Ndabisya, alimwi ncabufwubafwuba ncindacita.’ Aciindi aawa Davida waunka, eelyo Saulu wajokela kumunzi. Pele Davida walyaambauzya wati: ‘Pesi buzuba bumwi Saulu uya kundijaya. Ndeelede kuccijila kunyika yaba Filisiti.’ Oobo mbombubo mbwaacita. Davida wabacenga ba Filisiti akubapa kuti basyome kuti lino uli kulubazu lwabo.
Kwiinde mazuba, ba Filisiti baunka kwaakulwana bana Isilayeli. Munkondo, Saulu a Jonatani bajaigwa. Eeci capa kuti Davida ause kapati, aboobo walemba lwiimbo lubotu lwalo ndwaimba kuti: ‘Ndausa kapati mukwesu Jonatani. Ndayeeya mbookali kundiyanda!’
Kumane Davida wajokela ku Isilayeli mumunzi wa Hebuloni. Kuli mazwanga akati kabantu bayanda Isibosete mwana wa Saulu kuba mwami alimwi abaabo bayanda Davida kuti abe nguwe mwami. Pele bantu ba Davida bazunda. Davida ulaamyaka iili 30 naabikkwa kuba mwami. Kwamyaka iili ciloba acisela walela mu Hebuloni. Bamwi bana mbaakazyala, kuli Aminoni, Abisalomu a Adonija.
Casika ciindi Davida abantu bakwe cakuunka kwaakuzunda munzi mubotu wiitwa kuti Jelusalemu. Jowabu aumwi mwana wa Zeluya wamucizyi wa Davida, wasololela munkondo. Aboobo Davida wamupa bulumbu Jowabu kwiinda mukumubikka kuba mupati wabasikalumamba bakwe. Lino Davida watalika kulela mumunzi wa Jelusalemu.
1 Samuyele 26:1-25; 27:1-7; 31:1-6; 2 Samuyele 1:26; 3:1-21; 5:1-10; 1 Makani 11:1-9.
Mibuzyo
- Ncinzi Davida a Abisyayi ncibakacita Saulu naakali koona munkambi?
- Mibuzyo nzi Davida njaakabuzya Saulu?
- Ino Davida wakaya kuli naakazwa kuli Saulu?
- Ncinzi cakapa kuti Davida ause kapati calo cakapa kuti alembe lwiimbo lubotu?
- Wakajisi myaka yongaye Davida naakabikkwa abwami mu Hebuloni, alimwi mbabaani mazina bana bakwe bamwi?
- Nkuli alimwi Davida nkwaakalela kali mwami?
Mibuzyo aimwi
- Bala 1 Samuyele 26:1-25.
Atondezya nzi majwi aa Davida aalembedwe ku 1 Samuyele 26:11 caboola kumakani aambuli mbotweelede kububona bubambe bweendelezyegwa a Leza? (Int. 37:7; Balo. 13:2)
Notusoleka canguzu kutondezya luyando pele tujana kuti bantu tabatubikkili maano, mbuti majwi aa Davida aajanwa ku 1 Samuyele 26:23 mbwaatugwasya kutajoka munsi mukucita cibotu? (1 Bam. 8:32; Int. 18:20)
- Bala 2 Samuyele 1:26.
Mbuti sunu Banakristo mbobakonzya kuba ‘aluyando lwini-lwini cakutalengaana kuli umwi aumwi’ mbuli luyando ndobakajisi ba Davida a Jonatani? (1 Pita 4:8; Kol. 3:14; 1 Joh. 4:12)
- Bala 2 Samuyele 5:1-10.
Ino Davida wakalela myaka yongaye kali mwami, alimwi mbuti ciindi eeci ncaakalela mbocakali muzyibeela? (2 Sam. 5:4, 5)
Ngwani wakapa kuti Davida akomene, alimwi mbuti mbocili ciyeekezyo kuli ndiswe sunu? (2 Sam. 5:10; 1 Sam. 16:13; 1 Kor. 1:31; Flp. 4:13)
Andiza Inga Mwaakkomanina Ayaaya
AMUBAYIISYE BANA BANU
Davida Tanaakayoowa
Kobala makani aaya aakkomanisya kutegwa wiiye kaambo Davida ncaakali muntu uutayoowi.
