SAÚL litsakgsapara namakgniy David. Lin 3,000 soldados wantiku nema tlakg xalaktlan xlakata naputsakgoy David. Akxni David katsilh, kamalakgachalh chatiy kskgalananin xlakata naʼankgoy akxilhkgoy niku nalhtatay Saúl tama katsisni. Chu alistalh kakgalhskilh chatiy lakchixkuwin tiku talapulakgoy: ¿Tiku nakintaʼan anta niku lhtatamakgolh Saúl uma katsisni?

Akit nakan, wan Abisai. Abisai wa xkgawasa Zeruyá, xtalatsumat David. Akxni Saúl chu xsoldados xlhtatamakgolh, David chu Abisai tsekg tanukgolh anta niku klhtatama Saúl. Linkgolh xlanza Saúl chu xalu niku xtajuma xchuchut, nema xwi anta lakatsu kxakgxakga. Nitiku kaʼakxilhli xlakata putum klhtatamakgolh.

Kaʼakxilhti uku David chu Abisai. Tsalakgocha chu uku ksipi wilakgolh. David pixlanka waniy xapuxku soldado xalak Israel: Abner, ¿tuku xlakata nitu kuentajtlawapat mi mapakgsina? ¡Kaʼakxilhti! ¿Niku wi xlanza chu kxalu niku tajuma xchuchut?

Saúl lakgawa. Lakgapasli pi wantiku xchuwinama wa David chu kgalhskilh: ¿Wix David? ¿Akxilhpat Saúl chu Abner tutsu layakgolh?

Chuna kimapakgsina akit, kgalhtinalh David. Chu David kgalhskininalh: ¿Tuku xlakata kimakgniputuna? ¿Tuku nitlan ktlawanit? Uwi mi lanza kinpuxku. Wi tiku kamilh tiya.

Saúl wa: Nitlan tuku ktlawanit. Ni pulana klakapastakli tuku ktlawalh. Alistalh David alh chu Saúl taspitli kxchik. Pero David lakpuwa: Komo ni naktsala Saúl nakimakgniy. Nakan kxtiyat li Filistea. Chu chuna tlawalh. David tlan kaʼakgskgawilh li Filistea chu kamakanajlilh pi nakamakgtayay.

Chu ni makgas alh kilhtamaku li Filistea ankgolh katatlawa guerra li Israel. Anta kguerra Saúl chu Jonatán nikgolh. Uma tuku kaʼakgspulalh lu lilipuwa David chu tsokgli akgtum lu xastlan takilhtlin chu likilhtliy: Lu nitlan klimakgkatsi xlakata nialhtu wila wix Jonatán kintala. ¡Lu xakpaxkiyan!

Alistalh David taspitpa kʼIsrael, anta kkachikin Hebrón. Anta katatlawakgolh guerra soldados wantiku xlakaskinkgoy pi Is-bóset, xkgawasa Saúl mapakgsina nawan chu soldados wantiku lakaskinkgoy pi David mapakgsina nawan. Pero akxni sputli guerra wa tlajakgolh xsoldados David. David xkgalhi 30 kata akxni chalh xlimapakgsina. Akgtujun kata aitat mapakgsinalh anta kHebrón. Chu makgapitsi xkamanan tiku anta lakachinkgolh wa umakgolh, Amnón, Absalón chu Adonías.

Titaxtulh kilhtamaku David chu lakchixkuwin ankgolh akgchipakgoy akgtum kachikin lu xastlan wanikan Jerusalén. Joab atanu xkgawasa Zeruyá xtala David, wa pulalilh guerra. Wa xlakata David xapuxku xsoldados tlawalh. Chu David tsukulh mapakgsinan anta kkachikin wanikan Jerusalén.