САУ́Л Дави́дти тудуп алырын база бир оралдашкан. Ол бодунга 3 000 дээре дээн дайынчыларны аңгылап алгаш, ону дилеп чорупкан. Дави́д ооң дугайында билип каапкаш, Сау́л шерии-биле каяа хонарын билип алыр кылдыр, хайгыылчыларны чоргузупкан. Ооң соонда Дави́д ийи дайынчыдан айтырган: ‘Кайыңар мээң-биле Сау́лдуң турлаанче баарыл?’

— Мен баар мен,— деп, Авесса эки тура-биле чугаалаан. Ол Дави́дтиң угбазы Саруяның оглу-дур. Сау́л болгаш ооң шерии удуп чыдырда, Дави́д биле Авесса оларның турлаанче дааш чок, бүдүү кире бергеннер. Олар Сау́лдуң көңгүс бажының чанында чыдар, чыдазын болгаш доңгазын ап алганнар. Шупту удуп чыдар — оларны кым-даа көрбес-даа, дыңнавас-даа.

Дави́д биле Авесса кайда-дыр, көрем. Олар айыыл чок черже ырадыр халааш, ам даг кырында турлар. Дави́д Изра́ильдиң шерииниң даргазынга: ‘Авени́р, дээрги хааныңны чүге камгалавайн тур сен? Көрүп көр даан! Ооң чыдазы база суг кудар доңгазы кайда-дыр?’— деп алгырган.

Ынчан Сау́л оттуп келген. Ол Дави́дти үнүнден танып кааш айтырган: ‘Дави́д, сен сен бе?’ Адаанда Саул биле Авени́рни көрүп тур сен бе?

— Ийе, мен-дир мен, дээрги хааным,— деп, Дави́д харыылааш, Сау́лдан айтырган:— Чүге мени сүрүп тур сен? Сеңээ мен багай чүнү кылдым? Сээң чыдаң бо-дур, хаан. Сээң улустарыңдан бир кижи келгеш, ону ап алзын.

— Мен шын эвес кылган-дыр мен,— деп, Сау́л билинген.— Мен бодал чок чүвени кылдым.— Ооң соонда Дави́д Сау́л-биле чарылганнар: Дави́д бодунуң оруу-биле чорупкан, а Сау́л чана берген. Ынчалза-даа Дави́д иштинде боданган: ‘Кажан-бир Сау́л дөмей-ле мени өлүрер. Филисти́мчилерниң черинче дезер болзумза эки’. Ол ынчалдыр кылган. Дави́д ам филисти́мчилерниң талазында деп оларны мегелеп шыдапкан.

Элээн үе эрткен соонда, филисти́мчилер Изра́ильче дайылдажыр дээш чорупкан. Ол дайынга Сау́л биле Ионафа́н өлүп калган. Дави́д хөлчок кажыыдаан болгаш мындыг сөстерлиг чараш ыры чогаадып каан: ‘Мээң акым Ионафа́н, сен дээш дыка кажыыдап тур мен. Сен меңээ дыка-ла эргим турдуң!’

Ооң соонда Дави́д Изра́ильче, Хевро́н хоорайже эглип келген. Аңаа Сау́лдуң оглу Иевосфейни хаан кылдыр шилип алган улус-биле база Дави́дти хааннадыр дээн улустуң аразында дайын чоруп турар. Сөөлүнде кээп Дави́дтиң улустары тиилеп каан. Дави́д 30 харлыында хаан апарган. Чеди чартык чыл дургузунда ол Хевро́нга башкарып турар. Маңаа ооң Амнон, Авессало́м болгаш Адо́ния деп оолдары төрүттүнген.

Үе эртерге, Дави́д дайынчылары-биле чараш хоорай Иерусали́мни чаалаар дээш үнүпкен. Ол тулчуушкунну Иоа́в баштап турар — ол Дави́дтиң угбазы Саруя деп угбазының өске оглу. Ол дээш Дави́д Иоа́вты шеригниң даргазы кылып каан. Ол үеден эгелээш, Дави́д Иерусали́мге башкарып эгелээн.