NANGALIMBASOG na liwat hi Saul ha pagdakop kan David. Igin-upod niya an 3,000 han iya pinakamaopay nga kasundalohan ngan ginpinamiling nira hi David. Han hinbaroan ini ni David, nagsugo hiya hin mga espiya basi hibaroan kon diin nagkampo hi Saul hito nga gab-i. Katapos, nagpakiana hi David ha iya duha nga sundalo: ‘Hin-o ha iyo an maupod ha akon ngadto ha kampo ni Saul?’

‘Ako,’ binaton hi Abisay. Hi Abisay anak han bugto nga babaye ni David nga hi Seruya. Han nangangaturog hira Saul ngan an iya kasundalohan, hilom nga nagkamang ngadto ha kampo hira David ngan Abisay. Ginkuha nira an bangkaw ngan irinman ni Saul, nga nakadto ha iya ulohan. Waray nakakita o nakabati ha ira tungod kay hilarom an pangaturog nira Saul ngan han iya kasundalohan.

Kitaa yana hi David ngan Abisay. Hirayo na hira ngan talwas na ha igbaw han bungtod. Nagsinggit hi David ha lider han kasundalohan han Israel: ‘Abner, kay ano nga diri mo ginbabantayan an imo agaron, an hadi? Kitaa! Hain na an iya bangkaw ngan irinman?’

Nagmata hi Saul. Nakilala niya an tingog ni David, ngan nagpakiana: ‘Ikaw ba ito, David?’ Dinhi ha retrato, nakikita mo ba hi Saul ngan hi Abner ha ubos?

‘Oo, ginoo ko nga hadi,’ binaton hi David kan Saul. Ngan hi David nagpakiana: ‘Kay ano nga karuyag mo ako dakpon? Ano an akon nabuhat nga maraot? Aadi an imo bangkaw, O hadi. Pakadia an usa han imo mga sundalo basi kuhaon ini.’

‘Nagsayop ako,’ siring ni Saul. ‘Nagbuhat ako hin kalurongan.’ Dida hito linakat hi David, ngan inuli hi Saul. Kondi hi David nagsiring ha iya kalugaringon: ‘Maabot an panahon nga papatayon ako ni Saul. Kinahanglan pumalagiw ako ngadto ha tuna han mga Pilisteohanon.’ Ngan ito an iya ginbuhat. Nauwat ni David an mga Pilisteohanon salit tinoo hira nga nadapig na hiya ha ira.

Paglabay han panahon, nakig-away na liwat an mga Pilisteohanon ha Israel. Ha girra, namatay hira Saul ngan Jonatan. Nasubo gud hini hi David, salit nagkomposo hiya hin kanta: ‘Nasusubo ako tungod ha imo, akon bugto nga Jonatan. Hinigugma ko gud ikaw!’

Katapos hini binalik hi David ha Israel, ha syudad han Hebron. Nagkaada away butnga han mga tawo nga naruruyag magin hadi an anak ni Saul nga hi Isboset ngan han mga tawo nga naruruyag magin hadi hi David. Kondi nagdaog an mga nadapig kan David ngan nagin hadi hiya han 30 anyos hiya. Naghadi hiya ha Hebron hin pito ngan tunga ka tuig. Nagkaada hiya hin mga anak didto nga hira Amnon, Absalon, ngan Adonias.

Inabot an panahon nga ginsulong ni David ngan han iya kasundalohan an makaruruyag nga syudad nga tinatawag nga Jerusalem basi sakupon ito. Hi Joab, usa pa nga anak han bugto nga babaye ni David nga hi Seruya, an nanguna hito nga pakig-away. Salit, sugad nga balos, ginhimo ni David hi Joab nga lider han iya kasundalohan. Hito nga panahon, nagtikang pagmando hi David ha syudad han Jerusalem.