SAULI akulingalingasoni kuti amkamule Daudi. Jwalakwe akujigala asilikali ŵakwe ŵakumanyilila mnope masengo gawo ŵakwana 3,000 ni kutanda kumsosasosa Daudi. Daudi pamanyilile yeleyi, akwatuma ŵakusonda kwawula kukuwungunya kwacakagone Sauli ni acalume ŵakwe ciloco. Kaneko Daudi akwawusya acalume ŵakwe ŵaŵili kuti: ‘Nduni mwa jemanja jucalongane ni une kuti tujawule kwali Sauli?’

Abishayi akwanga kuti: ‘Une cilongane nawo.’ Abishayi ali mwanace jwa Seluya, alumbugwe Daudi. Sauli ni acalume ŵakwe ali mkugona, Daudi ni Abishayi akwawula mwangasinganga pamalo gakugonago. Akujigala lipanga lya Sauli ni mgawo wa mesi, yayaliji kumtwe kwa Sauli. Pangali jwakwawona kapena kwapikana ligongo wosopewo ŵagonile mnope.

Ana akum’wona Daudi ni Abishayi sambano? Jemanjaji atyosile pamalo pala, sambano ali pacanya petumbi. Daudi akumgumililila jwamkulungwa jwa asilikali ŵa Ayisalayeli kuti: ‘Abina, ligongo cici ngimkwateteya ambuje ŵenu, mwenye? Mlole! Lipanga ni mgawo wa mesi wa ambuje ŵenu!

Sauli akwimuka. Jwalakwe agamanyi kuti gali maloŵe ga Daudi, m’yoyo akuwusya kuti: ‘Ana mli mmwejo Daudi?’ Ana akum’wona Sauli ni Abina capasipo?

Daudi akumjanga Sauli kuti: ‘Elo, ambuje ŵangu mwenye.’ Kaneko Daudi akuwusya kuti: ‘Ligongo cici akulingalinga kuti angamule une? Ana ndesile cakulemwa catuli? Mwenye, lipanga lyawo ali. Amtume mundu jwawo ayice ajigale.’

Sauli akwiticisya kuti: ‘Ndemwisye. Ndesile yindu mwakuloŵela.’ Kaneko Daudi akwendelecela ulendo wakwe, Sauli akuwujila kumangwakwe. Nambo Daudi akuŵeceta jika kuti: ‘Lisiku line mpaka Sauli cacimbulaga. Ngusosekwa ndilile ku cilambo ca Afilisiti.’ Yeleyi ni yakutenda. Daudi akwaloŵesya Afilisiti, soni akwatendekasya kulupilila kuti ali mbali jawo.

Kaneko ndaŵi jine Afilisiti akwawula kukuputana ni Ayisalayeli. Pa ngondojo, Sauli ni Yonatani akuwulajigwa. Yeleyi yikumtendekasya Daudi kudandawula mnope, m’yoyo akulemba nyimbo jambone. Mu nyimbojo akwimba kuti: ‘Ngudandawula ligongo lya mmwejo, m’bale jwangu Yonatani. Mwaliji jwakunonyelwa mnope kwa une!’

Pambesi pa yeleyi Daudi akuwujila ku Yisalayeli mu msinda wa Hebuloni. Kaneko jikutendekwa ngondo pasikati pa ŵandu ŵamsagwile Isiboseti mwanace jwa Sauli kuti aŵe mwenye ni ŵandu ŵane ŵakusaka kuti Daudi aŵe mwenye. Nambo kumbesi kwakwe acalume ŵa Daudi akupunda pangondojo. Daudi akuŵa mwenye ali akwete yaka 30. Kwa yaka 7 ni hafu akulamulila ku Hebuloni. Mena ga ŵanace ŵane ŵaŵaŵelece ali ku Hebuloni gali Aminoni, Abisalomu, soni Adoniya.

Ndaŵi jikukwana jakuti Daudi ni acalume ŵakwe ajawule kukusumula msinda wakusalala wa Yelusalemu. Yowabu, jwali mwanace jwine jwa Seluya mlumbugwe Daudi, akwalongolela. M’yoyo Daudi akumpa mbote Yowabu mwakum’ŵika kuŵa jwamkulungwa jwa asilikali ŵakwe. Sambano Daudi akutanda kulamulila mu msinda wa Yelusalemu.