ILYO Davidi atendeke ukuteka mu Yerusalemu, Yehova alengele abashilika bakwe ukucimfya abalwani babo mu nkondo ishingi. Yehova alilaile ukuti akapeela abena Israele icalo ca Kanaani. Yehova alyafwile abena Israele kabili basukile bapoka icalo ca Kanaani conse.

Davidi ali ni kateka musuma. Alitemenwe Yehova. E ico ica kubalilapo ico acitile ilyo apokele umusumba wa Yerusalemu, kuleeta icipao ca cipangano ica kwa Yehova ku Yerusalemu. Kabili alefwaya no kukuula itempele umo cali no kulaikala.

Ilyo Davidi akulile, alicitile icintu icibi sana. Davidi alishibe ukuti cibi ukusenda icintu ca mwine. Lelo bushiku bumo, ilyo ali pa mutenge wa ng’anda yakwe, aloleshe pa nshi no kumona umwanakashi umusuma sana. Ishina lya uyu umwanakashi ni Batisheba, no mulume wakwe ni Uria, uwali pa bashilika ba kwa Davidi.

Davidi alefwaisha Batisheba. E ico aebele aba kuleta Batisheba ku ng’anda ya kwa Davidi. Umulume wakwe ninshi aliya ku nkondo. Davidi alisendeme na Batisheba. Pa numa Batisheba asangile ukuti ali ne fumo. Davidi alisakamene sana. E ico atumine uwa kuyaeba Yoabu, umukalamba wa bashilika ukuti abike Uria pa ntanshi ya bashilika pa kuti akafwe mu nkondo. Ilyo Uria afwile, Davidi aupile Batisheba.

Yehova alifulilwe sana pa fyo Davidi acitile. E co atumine Natani, umubomfi wakwe ukuyaeba Davidi ukuti alicitile ulubembu. E uyu Natani uuli apa alelanda na Davidi. Davidi alyumfwile sana ububi pa fyo acitile, e co Yehova ashamwipaile. Lelo Yehova amwebele ati: ‘Apo wacita ifi ifintu ifyabipa, mu ng’anda yobe mukaba amafya ayengi.’ Na cine Davidi alikwete amafya ayengi!

Intanshi, umwana wa kwa Batisheba alifwile. Lyena Amnone, umukalamba pa bana ba kwa Davidi, abuulile nkashi yakwe Tamari no kumupatikisha ukusendama nankwe. Ilyo ici cacitike, Absalomu umwana wa kwa Davidi alifulilwe sana ica kuti alipeye Amnone. Pa numa, Absalomu asembeleke abantu ukuti bamutemwe, aibika na pa bufumu. Davidi alicimfishe pantu Absalomu balimwipeye. Nga fintu wamona, Davidi alikwete amafya ayengi.

Pali iyi nshita, Batisheba alikwete umwana uo ainike ati Solomone. Ilyo Davidi akotele alilwele sana. E ico umwana wakwe Adoniya alefwaya ukuipeela ubufumu. Ilyo Davidi aumfwile, aebele shimapepo Sadoke ukupongolwela amafuta pa mutwe wa kwa Solomone ku kulanga ukuti Solomone e ukaba imfumu. Papitile fye inshita inono, Davidi alifwile ninshi ali ne myaka 70. Atekele pa myaka 40. Ilyo afwile Solomone e watampile ukuteka abena Israele.