MUZE Ndawichi aputukile kuyula mu Yerusaleme, Yehova yamwaha kukumba cha akwa kole jenyi eswe. Yehova te hanalakenya kuhana chifuchi cha Kanana kuli A-Izalele. Haliapwila, ni ukwaso wa Yehova, chifuchi cheswe chize anakalakenya yichipwa ni cho.

Ndawichi te mwanangana mupema. Iye te kakuzanga Yehova. Kashika chuma chitangu chize alingile muze atambwile Yerusaleme chili kuneha mushete wa usendo wa Yehova mu mbonge yacho. Nawa iye yazanga kutunga yimwe tembele hanga ausemo.

Muze Ndawichi te hapwa mukulwana, iye yalinga chimwe chuma chipi chinji. Ndawichi te kananyingika ngwo chili chipi chinji kwanda chuma chambala. Alioze ha umwe ufuku, muze te ali ku chipatulo cha kwilu ku zuwo lienyi, iye yatala mwishi yamona umwe pwo mupema chinji. Pwo wacho jina lienyi te Mbate-Shipa, lunga lienyi te umwe swalale jina lienyi te Uriya.

Ndawichi yazanga chinji Mbate-Shipa yatuma hanga amuneheneyo ku zuwo lienyi. Lunga lienyi te kali kusuku mu jita. Chocho, Ndawichi yapomba nenyi mba kulutwe lia matangwa iye yanyingika ngwo te kumapwa ni umwe mwana. Ndawichi yalipikala chinji, kashika iye yatuma Joabe mwata wa maswalale ase Uriya kulutwe lia jita hanga amushehe. Muze Uriya te hafwa, Ndawichi yalimbata ni Mbate-Shipa.

Yehova yevwila Ndawichi uli unji. Kashika yatuma kavumbi kenyi Natane hanga amwambe hakutwala ku shili yenyi. Yena muhasa kumona ha chizulie chize Natane anahanjika ni Ndawichi. Ndawichi yanyenganyana chinji ha yize anakalinga, kashika Yehova kakamushahile. Mba alioze Yehova yamba ngwenyi: ‘Amu yena hiwalinga yuma yino yipi, muukapwa ni kapinda ku zuwo lie.’ Chochene, Ndawichi kanakapwa ni kapinda munji!

Chitangu, mwana wa Mbate-Shipa yafwa. Nawa mwanenyi mutangu Amnone yakwata ndumbwenyi wa pwo Tama yamushinjila hanga apombe nenyi. Kashika Absalone mwana mukwo wa Ndawichi yachivwila uli unji, chocho yashaha Amnone. Kulutwe lia matangwa, Absalone yamuzanga chinji kuli atu, kashika yalipwisa iye mwene mwanangana. Hi Ndawichi yakumba jita hali mwanenyi Absalone, muze anakamushaha. Ewa, Ndawichi kanakapwa ni kapinda munji.

Ha yuma yeswe yino, Mbate-Shipa yashita nawa mwana mukwo jina lienyi te Solomone. Muze Ndawichi te hapwa kashinakaji nawa ni yikola, mwanenyi Adonija yamba kulipwisa iye mwene mwanangana. Ha matangwa jacho, Ndawichi yatuma umwe sasendote jina lienyi te Zadoke hanga awahise Solomone ni maji ha mutwe wenyi, hanga asolole ngwo Solomone mwe makapwa mwanangana. Kulutwe lia yino yuma, Ndawichi yafwa ni 70 a miaka. Iye kanakayula mu unji wa 40 a miaka, alioze haliapwila Solomone mwe mwanangana wa Izalele.