Kukwe kira 62

Kukwe tare David gwirete

DAVID namani gobrane Jerusalén ye bitikäre, Jehovakwe nitre rükä kwe ye mikani ganane krubäte. Jehovakwe kä Canaán ye käbämikani nitre Israel ie. Jehová ye köböire, kä käbämikani ietre ye jökrä namani kwetre.

David gobranka kwin. Jehová tare kwe. Yebätä, Jerusalén ye diani kwe jai angwane, käne nikani kaja deme Jehovakwe ngwena kä yekänti. Tö namani templo sribei mikakäre.

Ye bitikäre, David kukwe käme nuainbare. Jondron jenena diandre jai ye käme gare ie. Akwa bati deu, nämene ju gobrankäre yete, angwane nikrabare kuintubu kwe aune meri bä nuäre krubäte jutuabare ie. Kä Bat-seba aune muko kwe abokän ni rükä Davikwe kädeka nämene Urías.

David tö namani krubäte Bat-seba ie yebätä ni juani iti kwe tuin. Niara muko nämene mente rüre. David käkwe niara mikani jabe biti niara monsoi rabai namani gare ie. David namani ja töibikaire krubäte aune Urías kämikadre ie tö namani, yebätä Joab nitre rükä jie ngwanka käkwe Urías mikadre nitre rükä ye känenkri niebare kwe ie. Urías ye mürie ketani angwane David käkwe ja mikani gure Bat-seba ben.

Jehová namani rubun krubäte David kräke. Natán juani kwe kukwe käme ye mikakäre gare ie. Natán tä David ben ye tuin mäi. David kukwe nuainbare yebätä ja namani ruin käme krubäte ie, aune Jehová käkwe ñaka mürie ketani. Akwa niebare kwe: ‘Mä kukwe käme ne nuainbare, yebätä kukwe tare rabai bare mä gwirete.’ ¡Kukwe tare krubäte tä David kisete!

Käne, Bat-seba monsoi ye krütani. David monsoi kena, Amnón, käkwe ngwai kwe Tamar mikani ja dibiti jabe. Yebätä Absalón David monsoi namani rubun, Amnón kämikani kwe. Ye bitikäre, Absalón käkwe ni kwati töi mikani jakri aune nitre töi mikani kwe ja mike reire. Mrä mada, David käkwe Absalón ganainbare rübätä, aune kämikani. David ja tare nikabare krubäte.

Kukwe jökrä ne ngätäite, Bat-seba monsoi namani iti kädekani Salomón. David namanina umbre bätä bren angwane, Adonías tö namani ja mikai reire. Ye ngwane, David käkwe sacerdote Sadoc ye mikani aseite keke Salomón dokwäbiti, Salomón rabai reire ye bämikakäre. Ye biti kä namani 70 Davibiti angwane krütani. Kä gre ketebu te gobranbare kwe. Salomón namani reire mada.

2 Samuel 11:1-27; 12:1-18; 1 Reyes 1:1-48.