Oumba meṱunḓu raDavid
EHUNGI 62
Oumba meṱunḓu raDavid
KOMBUNDA yaDavid tja uta okuhonapara mu Jerusalem, Jehova we mu pa outoṋi ouingi kotjira tje tjovita kombanda yovanavita vawo. Jehova wa kwizika okuyandja ehi raKanaan kOvaisrael. Okutja, nombatero yaJehova, ehi arihe nda kwizikirwa wo korusenina ra rira orawo.
David wa ri omunane omuwa. Eye wa suverere Jehova. Mena ranao otjiṋa otjitenga tja tjita indu tja za nokukambura Jerusalem, okueta otjipwikiro tjaJehova tjomerikutiropamwe ingo. Nu eye aa vanga okutunga ondembeli okutjitwamo.
Indu David tja rira omunene wa tjita ondataiziro ombi. David aa tjiwa kutja ouposyo okutoora otjiṋa tjomundu warwe. Nungwari ongurova imwe, indu eye tja ri komututu wondjuwo ye youhona, wa tara pehi na munu omukazendu omuwa tjinene. Ena re ra ri Batseba, nu omurumendu we wa ri umwe wovarwe ve vovita wena Uria.
David aa vanga Batseba tjinene nga tja raa kutja ma etwe kondjuwo ye youhona. Omurumundu we wa ya kovita. Okuzambo David wa rara puna ye nu kombunda we ri muna kutja wa rire otjingundi. David ee rikende tjinene nga tja hinda omambo komuhongore we wovita Joab kutja ma twe Uria komurungu motjirwa kutja ma zepewe. Indu Uria tja ṱa, David wa kupa Batseba.
Jehova wa pindikira David tjinene. Mena ranao eye wa hinda omukarere we Natan me ke mu raere ohunga nourunde we. Imbo mo munu Natan ngu ma hungire na David. David wa hihamwa omutima na imbi mbya tjita, nu mena ranao Jehova kena pe mu zepa. Nungwari Jehova wa tja: ‘Mena rokutja ove wa tjita oviṋa ovivi mbi, ove mo kara noumba meṱunḓu roye.’ Nu tjiri David wa ri noumba.
Rutenga, omuzandu waBatseba wa ṱa. Okuzambo omuzandu waDavid otjiveri Amnon, wa kondja okukara erike puna omuṱena kwe Tamar ne mu ṋiṋikiza komasa kutja ma rare puna ye. Omuzandu waDavid Absalom wa pindikire tjinene notjiṋa hi nga tja zepa Amnon. Kombunda Absalom wa muna ondjingonekero yovandu ovengi, nu we riririsa omuini ombara. Korusenina, David wa taara ovita kuna Absalom, nu Absalom wa zepewa. David wa munine oumba ouingi.
Pokati kaavihe mbi, Batseba wa panduka omuzandu wena Salomo. Indu David tja kurupire na tja verere, omuzandu we Adonija wa kondjisa okuririsa omuini ombara. Okuzambo David wa raera omupristeri Zadok ma tirire omaze motjiuru tjaSalomo okuraisa kutja Salomo ma rire ombara. Tjimanga kombunda yanao David wa ṱa nozombura 70. Eye wa honapara oure wozombura 40, nungwari Salomo ongwa rira ombara yaIsrael.
