AKỤKỌ NKE 62
Nsogbu Adị n’Ụlọ Devid
MGBE Devid malitere ịchị n’ime Jeruselem, Jehova mere ka ndị agha ya merie ndị iro ha ọtụtụ ugboro. O kwewo nkwa inye ndị Izrel ala Kenan. Ma ugbu a, site n’enyemaka Jehova, ala niile ahụ o kwere ha ná nkwa emesịala ghọọ nke ha.
Devid bụ ezigbo onye ọchịchị. Ọ hụrụ Jehova n’anya. Otu n’ime ihe ndị o mere mgbe ọ dọọrọ Jeruselem n’agha bụ ibubata igbe ọgbụgba ndụ Jehova n’ebe ahụ. O wee chọọ iwu ụlọ nsọ ebe a ga-edebe ya.
Ka oge na-aga, Devid mere otu mmehie dị oké njọ. Devid maara na o zighị ezi iwere ihe bụ́ nke onye ọzọ. Mgbe ọ nọ n’elu obí ya n’otu uhuruchi, o ledara anya n’ala ma hụ otu nwaanyị mara ezigbo mma. Aha ya bụ Bat-shiba, di ya bụ Yuraya, bụ́ otu n’ime ndị agha Devid.
Devid bịara nwee mmasị gabigara ókè n’ebe Bat-shiba nọ nke na o mere ka e dute ya n’obí ya. Di ya jere agha. Devid wee soro ya nwee mmekọahụ. E mesịa, Bat-shiba chọpụtara na ya atụrụwo ime. Devid nwere oké nchegbu, o wee zie Joab onyeisi agha ya ka o debe Yuraya n’ihu agha ebe a ga-egbu ya. Mgbe Yuraya nwụrụ, Devid wee kpọrọ Bat-shiba lụwa.
Jehova wesara nnọọ Devid iwe. O wee ziga ohu ya bụ́ Netan ka ọ kọọrọ ya banyere mmehie ya. Ị pụrụ ịhụ Netan ebe a ka ọ na-agwa Devid okwu. Ihe Devid mere wutere Devid nke ukwuu, n’ihi ya, Jehova egbughị ya. Kama Jehova gwara ya, sị: ‘N’ihi ihe ọjọọ ndị a i mere, ị ga-enwe ọtụtụ nsogbu n’ezinụlọ gị.’ Devid nwekwara nnukwu nsogbu n’ezie!
Nke mbụ, nwa Bat-shiba nwụrụ. E mesịa, Amnọn diọkpara Devid dinara nwanne ya nwaanyị n’ike, mgbe ha nọ naanị ha. Absalọm nwa Devid were iwe wee tigbuo Amnọn. E mesịa, Absalọm bịara mee ka ọtụtụ ndị nwee mmasị n’ebe ọ nọ, o wee mee onwe ya eze. N’ikpeazụ, Devid meriri Absalọm n’agha, e wee gbuo Absalọm. N’ezie, Devid nwere ọtụtụ nsogbu.
N’oge a niile, Bat-shiba mụrụ nwa a na-akpọ Solomọn. Mgbe Devid kara nká wee rịa ọrịa, Adọnaịja nwa ya nwara ime onwe ya eze. Devid wee mee ka Zedọk onyeisi nchụàjà wụsa mmanụ n’isi Solomọn, igosi na ọ ga-abụ eze. Ọ dịghị anya, Devid wee nwụọ mgbe ọ gbara afọ iri asaa. Ọ chịrị afọ iri anọ, Solomọn wee bụrụzie eze Izrel.