TAQSIṬ TIS 62

Iɣeblan n Dawed

ASMI i gebda Dawed leḥkem-​is di Yarucalim, Yahwa yesserbeḥ-​it deg waṭas n lgirrat. Tecfiḍ? Yahwa iɛuhed ad yefk tamurt n Kanɛan i wat Isṛayil. Di zzman n Dawed, s lemɛawna n Yahwa, tamurt meṛṛa i sen-​iɛuhed tuɣal d ayla n wat Isṛayil.

Dawed d aneḥkam yelhan. Iḥemmel aṭas Yahwa. Akken kan i d-​iḥeṛṛa Yarucalim, yewwi ɣer dinna asenduq n leɛqed n Yahwa. Yebɣa ad yebnu lemqam anda ara t-​yerr.

Mi gennerna Dawed di leɛmeṛ, yexdem ddnub ameqran. Yeẓra belli diri win iteddmen ayla n medden. Lameɛna yiwet tmeddit, yuli ɣer ṣṣdeḥ n wexxam-​is, dɣa iwala yiwet n tmeṭṭut icebḥen aṭas. Isem-​is Bat-​Cibaɛ, argaz-​is d aɛsekṛiw yeţţusemman Uryah.

Dawed yebɣa mliḥ Bat-​Cibaɛ armi i ţ-​id-​yewwi s axxam-​is. Argaz-​is iṛuḥ ɣer lgirra. Dawed yeṭṭeṣ yid-​es, yuɣal terfed s tadist. Dawed yenneẓma ayendin. Dɣa yura i Yuwab yellan d aneḥkam n lɛeskeṛ-​is akken ad imekken Uryah ɣer wemkan anda yeḥma imenɣi iwakken a t-​nɣen. Asmi i gemmut Uryah, Dawed yuɣal yezweǧ neţţa d Bat-​Cibaɛ.

Yahwa yerfa aṭas ɣef Dawed. Dɣa iceggeɛ-​as aqeddac-​is Natan akken a s-​yemmeslay ɣef ddnubat yexdem. Tzemreḍ aţ-​ţwaliḍ di ţţeswiṛa-​ya m’akka i s-​iheddeṛ. Dawed yendem aṭas deg wayen yexdem, ɣef waya ur t-​iɛuqeb ara Yahwa s lmut. Lameɛna Yahwa yenna-​yas: ‘Imi txedmeḍ yir leḥwayeǧ-​agi aţ-​ţemmagreḍ aṭas n iɣeblan deg wexxam-​ik.’ Ih, acḥal iɣeblan i gemmuger Dawed!

Amezwaru seg-​sen: yemmut mmi-​s i d-​yesɛa d Bat-​Cibaɛ. Umbeɛd, Amnun, mmi-​s amenzu n Dawed, yeṭṭef weltma-​s Tamar weḥd-​es, iḥettem-​iţ aţ-​ţeṭṭeṣ yid-​es. Abcalum, mmi-​s nniḍen n Dawed yezɛef zzɛaf ameqran i t-​yewwin ad ineɣ Amnun. Iɛedda kra n lweqt, Abcalum yufa lemzeyya ɣer waṭas n lɣaci, dɣa yesbedd iman-​is d agellid. Ɣer taggara, Abcalum yemmut di lgirra yexdem neţţa d baba-​s. Twalaḍ, mačči d yiwet n twaɣit i gḥuzan Dawed!

Yuɣ lḥal Bat-​Cibaɛ tesɛa-​d aqcic, isem-​is Sliman. Asmi i guɣal Dawed d amɣar yerna yehlek, mmi-​s Adunyahu yeɛreḍ ad yuɣal d agellid deg wemkan n baba-​s. Dɣa Dawed yumeṛ i lmuqeddem Ṣaduq ad yedhen aqerru n Sliman s zzit akken a d-​ibeggen belli d neţţa i guɣalen tura d agellid. Mbeɛd yemmut Dawed mi gesɛa 70 iseggasen di leɛmeṛ-​is. Yeḥkem 40 n sna. Tura d Sliman i guɣalen d agellid ɣef Isṛayil.

2 Camwil 11:1-27; 12:1-18; 1 Igelliden 1:1-48.