LAJ David ak yook chi awabʼejink saʼ li tenamit Jerusalen naq li Jehobʼa kixbʼaanu naq naabʼal sut teʼelq chiʼus saʼ li yalok. Li Jehobʼa kixyeechiʼi li tenamit Canaan rehebʼ laj Israel. Joʼkan naq, saʼ xkʼabʼaʼ li Jehobʼa keʼreechani chixjunil li chʼochʼ aʼin.

Laj David naxra li Jehobʼa ut naxnaw awabʼejink. Naq keʼreechani li tenamit Jerusalen laj David kixkʼam aran xkaaxil li sumwank. Joʼkan naq traj xyiibʼankil jun Rochoch li Jehobʼa re naq wanq xnaʼaj li kaax aʼin.

Keʼnumeʼk li chihabʼ ut laj David kimaakobʼk. Laj David naxnaw naq nimla maak xchapbʼal li maawaʼ qe. Saʼ jun qʼoqyink, laj David yook chi bʼeek saʼ xmuhebʼaal li rochoch naq kiʼilok taqʼa kixkʼe reetal naq wank jun li ixq chʼinaʼus naʼilok. Aʼan li xBat-seba ut aj Urias xkʼabʼaʼ li xbʼeelom li ixq aʼin. Laj Urias nakʼanjelak choʼq aj puubʼ rikʼin laj David.

Laj David kixra ru wank rikʼin xBat-seba joʼkan naq kixtaqla xbʼoqbʼal. Li xbʼeelom li xBat-seba najt yook chaq chi yalok. Laj David kiwank rikʼin li ixq. Chirix chik aʼan, kixnaw naq li xBat-seba wank saʼ yuʼam. Laj David kiʼok xkʼaʼuxl, joʼkan naq kixye re laj Joab, li najolomink rehebʼ laj puubʼ, naq tixkʼe laj Urias chiruhebʼ li xikʼ nekeʼilok rehebʼ re naq tkamsiiq. Naq kikamk laj Urias, laj David kisumlaak rikʼin xBat-seba.

Li Jehobʼa kichalk xjosqʼil rikʼin laj David. Joʼkan naq kixtaqla laj Natan re xyeebʼal re laj David li xmaak. Saʼ li eetalil nakʼutunk naq laj Natan wank rikʼin laj David. Laj David kiyotʼeʼk xchʼool, joʼkan naq li Jehobʼa inkʼaʼ kixkamsi. Laj Natan kixye re laj David: ‹Kʼaʼut naq xatmaakobʼk, anaqwan tchalq li rahilal saʼ laajunkabʼal›. Nim li rahilal kichalk saʼ xbʼeen laj David!

Joʼkan naq, kikamk li xyum li xBat-seba. Chirix chik aʼan, laj Amnon, li xbʼeen ralal laj David, kixchap ut kiyoklaak rikʼin li xTamar, li ranabʼ. Tojaʼ naq, kichalk xjosqʼil laj Absalon ut kixkamsi laj Amnon, li ras. Laj Absalon kixbʼaanu naq ebʼ laj Israel teʼxkʼe choʼq awabʼej. Laj David kiʼelk chiʼus naq kiyalok rikʼin laj Absalon. Tojaʼ naq kikamk laj Absalon. Naabʼal li rahilal kixkʼul laj David.

Li xBat-seba kiwank jun chik xyum, aj Salomon kixkʼe choʼq xkʼabʼaʼ. Ak cheek ut yaj laj David naq laj Adonias, li ralal, kixyal kanaak choʼq awabʼej. Joʼkan naq laj David kixye re laj Sadoc, laj tij, naq tixkʼe aseeyt saʼ xjolom laj Salomon re xkʼutbʼesinkil naq li ralal aʼin tkanaaq choʼq awabʼej. Moqon chik kikamk laj David naq wank 70 chihabʼ re. Chiru 40 chihabʼ kiʼawabʼejink laj David ut laj Salomon kikanaak choʼq awabʼej.